विराटनगर । नेकपा एमाले मोरङको नेतृत्व चयनमा एमाले अध्यक्ष केपी ओलीलाई धक्का लागेको छ । दशौं अधिवेशनबाट पदाधिकारीमा ओली समर्थित सबै पदाधिकारीले पराजय भोग्नु परेको हो ।

ओली पक्षलाई विनोद ढकाल पक्षले पराजित गरेको छ । ढकाल पक्षबाट उम्मेद्वार बनेका पाँचै जना पदाधिकारी विजयी भएका हुन् ।

सार्वजनिक भएको मत परिणाम अनुसार ढकालले अगाडि सारेका अध्यक्षका उम्मेद्वार अजम्बर राईले ४४६ मत ल्याउँदा संस्थापन पक्षका राजकुमार ओझाले ४०७ मत मात्रै ल्याएका छन् । यस्तै उपाध्यक्षमा ढकाल पक्षका सागर थापाले ४२२ मत ल्याउँदा संस्थापनकी शान्तिकुमारी लिम्बूले ३९१, सचिवमा ढकाल पक्षका सोमराज थापाले ४६२ मत ल्याउँदा संस्थापनका रविन थापाले ३६८ मत पाएका छन् ।

यस्तै उपसचिवमा ढकाल पक्षका सन्तोष वान्तवाले ४९० र उषा झाले ४१८ मत ल्याउँदा संस्थापन पक्षका इर्जालाल राजवंशीले ३११ र शिल्पा कार्कीले ४०५ मत ल्याएकी छिन् । अधिवेशनमा ८ सय ८८ मत खसेको थियो ।

निर्वाचन समितिले भने औपचारिक परिणाम घोषणा गरेको छैन । जिल्ला समिति सदस्यहरुको भने मत परिणाम आउन अझै समय लाग्ने देखिएको छ ।