बिर्तामोड ।  नेतृत्वको तीखो आलोचना र पार्टी भित्रै प्रतिपक्षको भूमिका निर्वाह गरिरहेका नेपाली कांग्रेसका नेता शेखर कोइराला झापा आउने भएका छन् । कोइरालाको झापा भ्रमण तय भएसँगे पार्टी भित्र त्यसको चर्चा चुलिएको छ । पार्टी महामन्त्री विश्वप्रकाश शर्मा र पूर्वमहामन्त्री कृष्णप्रसाद सिटौला गृहजिल्ला झापाबाट काठमाण्डौ फर्किएको एकसाता नबित्दै कोइराला झापा आउने भएपछि सो विषयले चर्चा पाएको हो । 

आफ्नो छुट्टै गुटमार्फत सभापति देउवालाई टक्कर दिइरहेका नेता कोइराला १५औँ महाधिवेशनमा सभापतिमा प्रतिस्पर्धा गर्ने उद्घोषका साथ देश दौडाहामा छन् । त्यही सिलसिलामा उनी झापा आउन लागेका हुन् । प्रभाव बिस्तारको आन्तरिक योजना अनुरुप नेता कोइराला दुई दिन झापा बस्ने  निकटस्थहरु बताउँछन् । 

पूर्वमहामन्त्री सिटौला फागुन १५ गते कांग्रेस शिवसताक्षी नगर समितिले दुधेमा आयोजना गरेको  कार्यकर्ता भेला र फागुन १७ गते बिर्तामोडमा आयोजित ठाकुर अनुकुलचन्द्रको १३७औँ जन्मोत्सवमा सहभागी भएर काठमाण्डौ फर्किएका थिए ।

यता महामन्त्री शर्मा फागुन १६ गते मेचीनगर प्रेस क्लबको पद हस्तान्तरण र १७ गते धुलाबारी खानेपानीको २४औँ वार्षिक साधारण सभामा सहभागी भएर राजधानी फर्किएका थिए । नेता सिटौला बुधबार (आज) ‘राष्ट्र निर्माणमा युवाको योगदान, तथ्यमा आधारित प्रचार अभियान’ लाई सम्बोधन गर्न  सुदुरपश्चिमको कैलाली पुगेका छन् । महामन्त्री शर्मा बिहीबार मकवानपुरमा आयोजित क्रियाशील तथा अगुवा कार्यकर्ताको भेलामा सहभागी हुने कार्यक्रम छ ।

पार्टीको १५औँ महाधिवेशनमा सभापति उठ्ने यसअघि नै घोषणा गरिसकेका नेता कोइराला २३ गते  शुक्रबार झापा आउने र दुई दिन यतै बस्ने कार्यक्रम तय भएको उनी निकट तरुण दलका केन्द्रीय सदस्य नेत्र पौडेलले बताए । पौडेलका अनुसार नेता कोइराला २३ गते झापा पार्टी नेतृत्व र नेता, कार्यकर्तासँगको आन्तरिक छलफलमा व्यस्त रहने छन् । नेता कोइरालाले २४ गते कांग्रेस जिल्ला पार्टी कार्यालय महानन्दचोकमा पूर्व आप्रवासी समन्वय विभागको कोशी प्रदेश स्तरीय प्रथम भेलाको उद्घाटन गर्ने कार्यक्रम छ । यो भेलामा कोशी प्रदेशका १४ जिल्लाबाट पाँच÷पाँचजना सहभागी हुने विभागका कोशी प्रदेश संयोजक विज्ञान प्रसाईंले जानकारी दिए । यो कांग्रेसको नयाँ विभाग हो । 

रिटर्नीहरुको  कोशी स्तरीय पहिलो भेला नेता कोइरालाबाट उद्घाटन गराएर सिटौला, शर्मा पक्षलाई झापामा आफ्नो दर्बिलो उपस्थितिको सन्देश दिन कोइराला पक्षीय नेताहरू लागेको सहज अनुमान लगाउन सकिन्छ । रिटर्नी भेला मार्फत शेखर पक्षले पार्टी सभापति उठ्ने योजनामा रहेका नेता सिटौलालाई गृहजिल्ला झापाबाटै रणनीतिक दबाब बढाउन चाहेको विश्लेषणसमेत गरिएको छ ।

बरियता विवादका कारण पार्टी नेतृत्वसँग असन्तुष्ट कोइरालाले कांग्रेस–एमाले सरकार बनाउन महत्वपूर्ण भूमिका निर्वाह गरेका थिए ।  त्यसको पनि सम्मानजनक जस नपाएपछि कोइराला आफू र आफ्नो टिमलाई थप सक्रिय बनाउन लागिपरेका छन् । सोही सिलसिलामा उनी झापा आउन लागेका हुन् ।