विराटनगर । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले आफ्ना केन्द्रीय सदस्यहरुले सम्पत्तिको स्रोत देखाउनुपर्ने बताएका छन् । उनले आज विराटनगरमा पत्रकारहरुसँग कुराकानी गर्दै आफ्ना नेताहरुले गैरकानुनी आर्जन गरेको पाइए कारबाही गरिने बताएका हुन् ।

माओवादी केन्द्रको केही दिन अगाडि सम्पन्न केन्द्रीय समितिको बैठकले केन्द्रीय सदस्यहरुले सम्पत्ति विवरण बुझाउनु पर्नेसहितको प्रतिवेदन पारित गरेको थियो ।

अध्यक्ष प्रचण्डले नेताहरुले सम्पत्ति विवरण बुझाउनु पर्ने मात्रै नभएर सम्पत्तिको स्रोत पनि देखाउनु पर्ने र गैरकानुनी ढंगले कमाएको देखिए कारबाही गरिने पनि बताए । ‘कारबाही गर्नकै लागि त्यो भनिएको हो । हामीले पहिले पनि महाधिवेशनबाट पनि यो कुरा (सम्पत्ति विवरण बुझाउने कुरा) उठाएका थियौं । त्यसलाई योजनामा ढालेका थिएनौं । अहिले हामीले प्रदेश पदाधिकारी र केन्द्रीय समितिको र क्रमैसँग तलैसम्म सम्पत्ति विवरण बु्झाउने मात्रै होइन, त्यसको स्रोत खुलाउने, जिविका कसरी चलिरहेको छ परिवार र परिवारको सदस्यको भनेर बुझ्न खोजेका छौं,’ उनले भने, ‘त्यो मात्रै होइन हामीले अनुगमनको लागि हामीसँग भएको शक्ति सम्पन्न लेखा आयोग छ । त्यसलाई अनुगमनको जिम्मा पनि दिइसकेका छौं । दोषी देखियो भने कारबाही गरिन्छ ।’

उनले आफुले संसदबाटै त्यो कुराको प्रतिबद्धता गरेको पनि बताए । ‘मैले विश्वासको मत लिँदा संसदबाटै जनताप्रति प्रतिबद्धता जनाएको छु । हामी हाम्रो वर्गतिर फर्किन्छौं, एजेण्डातिरै फर्किन्छौं । काँग्रेस र एमालेतिर लागेर देशलाई पनि फाइदा पनि भएन र आन्दोलनलाई पनि फाइदा भएन भन्ने कुराकै त्यो अभिव्यक्ति हो,’ उनले भने ।

प्रचण्डले वर्तमान गठबन्धन अप्राकृतिक रहेको र राजनीतिक दुर्घटनाको जोखिम रहेको पुनः दोहोर्याए । ‘यो गठबन्धन बनेदेखि नै मुलुकमा राजनीतिक दुर्घंटनाको खतरा बढेको छ । सदन बोलाउनु पर्ने बेलामा अध्यादेश आएको छ । त्यो पनि संविधान र कानुन मिचेर ल्याइएको छ । सदनमा छलफलको क्रममा रहेको विधेयकसँग सम्बन्धित विषय पनि अध्यादेश आएको छ । त्यहि कारण विपक्षी सात राजनीतिक दलको बैठक बसेर त्यसको विरोधमा खडा भएका छौं । यो अध्यादेश फिर्ता लिनु जरुरी छ । किन भने दुई तिहाई भएको सरकारले सदनबाटै कानुन ल्याए भइगयो नि, सदनमा लगेर कानुन बनाए भयो नि । तर, किन अवैध ढंगबाट ल्याइयो ?’ उनले भने ।

उनले आफुले सरकार ढल्छ नभनेको बताए । ‘सरकार जुन बाटोबाट हिंडेको छ । त्यो असहज बाटो छ । त्यसले लोकतन्त्र र संविधानलाई दुर्घटनातिर लैजाने बाटोमा छ भन्ने कुरा हो । अर्को कुरा सरकारमा जाने हतारो छैन । सरकारको उल्टो यात्राले सरकार ढल्छ भनेको हो,’ प्रचण्डले भने, ‘दुई तिहाईको अहंकार देखाउँदै जाने, संविधान मिच्दै जाने, अध्यादेशबाट शासन गर्दै जाने र भ्रष्टाचारीलाई जोगाउँदै जाने हो भने सडकबाट ठूलो संघर्ष हुन्छ । यो कुरा हामीले सरकारलाई चेतावनी दिएका हौं । यो कुरा सरकारले बुझोस्, राष्ट्रिय अन्तराष्ट्रिय परिस्थितिलाई पनि बुझोस् भन्ने कुरा हो । यो कुरा नबुझेर सरकारले हल्का रुपमा लियो भने सडकमा ठूलो आन्दोलनको परिस्थिति सिर्जना हुनसक्छ ।’