बिर्तामोड । मंसिर ७ गते काठमाण्डौमा आयोजना गरिएको जागरण सभा आफुहरुले आयोजना नगरेको एमाले मुख्यालयले जनाएको छ । आइतबार जरिवाना पत्र बुझाउन गएका महानगरको टोलीलाई कार्यक्रमको आयोजक आफु नभएको भन्दै एमाले मुख्यालयले पत्र बुझ्न अस्वीकार गरेको हो ।

गत शुक्रबार दरबारमार्गमा जागरण सभामा सडक तथा पेटीमा जथाभावी फोहोर गरेको भन्दै काठमाण्डौ महानगरले नेकपा एमालेलाई एक लाख जरिवाना तोकेर पत्र लेखेको थियो । उक्त पत्र लिएर पुगेको टोलीलाई एमालेले पत्र नबुझी फिर्ता गरेको हो ।

गत शुक्रबार एमालेका काठमाण्डौ, भक्तपुर र ललितपुर जिल्ला कमिटीको आयोजनामा दरबारमार्गमा जागरण सभा आयोजना गरिएको थियो ।

महानगरपालिकाले फोहोरमैला व्यवस्थापन ऐन, २०६८ र काठमाण्डौ महानगरपालिकाको आर्थिक ऐन, २०८१ बमोजिम जरिवाना तोकिएको बताएको छ ।

एमालेले पत्र बुझ्न नमानेपछि महानगरको टोली केहीबेर कार्यालय परिसरमा रोकिएर फर्किएको छ ।

एमाले केन्द्रीय कार्यालय सचिव भीष्म अधिकारीले आफूहरूले सभा गरेको स्थान आफैं सफा गरिसकेकाले जरिवाना तिर्न नपर्ने तर्क गरेका छन् ।