झापा । नेकपा एमालेले जागरणसभा सभास्थल परिवर्तन गरेको छ । यस अघि भृकुटीमण्डपमा गर्ने भनिएको जागरणसभा दरबारमार्गमा सारिएको हो ।

बुधबारजागरण सभा संयोजन समितिका संयोजक डा. राजन भट्टराईले विज्ञप्ति जारी गर्दै जागरणसभाको पूर्वनिर्धारित सभास्थलमा परिवर्तन गरिएको जानकारी दिएका हुन् ।  एमालेले उपत्यकाका काठमाण्डौ, ललितपुर र भक्तपुर तीन जिल्ला कमिटीको आयोजनामा बिहीबार राजधानीमा जागरण सभाको आयोजना गर्दैछ ।

विज्ञप्तिमा भनिएको छ,‘जागरणसभा अघि हुने र्याली पूर्वनिर्धारित समयमै भद्रकालीबाट सुरु भई सुन्धारा, वीर अस्पताल, रत्नपार्क, घण्टाघर हुँदै दरबारमार्गमा पुगेर सभामा परिणत हुने भएकाले सोही बमोजिम ट्राफिक व्यवस्था मिलाउन र जागरण र््याली तथा सभामा सहभागी हुन सबैमा अनुरोध गरिन्छ ।’

मुलुकमा फैलाउन खोजिएको अराजकता र अस्थिरतालाई चिर्न जागरण सभा आयोजना गरिएको एमालेले जनाएको छ । यता मुलुकको प्रधानमन्त्री नै अध्यक्ष भएको दलले सडकमा मानिस उतार्न लागिएको भन्दै आलोचनासमेत भइरहेको छ ।