एजेन्सी । भारतको उत्तराखण्डस्थित रुद्रप्रयागबाट केदारनाथ जाने बाटोमा गएको पहिरोमा परि ४ जना नेपालीको मृत्यु भएको छ । मृत्यु हुनेमा चितवन माडीका ३ जना र दैलेखका १ जना रहेका छन् ।

बिहीबार राति आएको पहिरोमा परी मृत्यु हुनेमा चितवन माडी नगरपालिका–२ शीतलनगरका पूर्ण नेपाली, तुलबहादुर परियार र कृष्णबहादुर परियार छन् । तुलबहादुर र कृष्ण मामा–भान्जा हुन् । उनीहरू तीनै जनाको रुद्रप्रयागस्थित सरकारी अस्पतालमा पोस्टमार्टम गरिएपछि आफन्तले शव बुझेको दिल्लीस्थित नेपाली दूतावासका काउन्सिलर उमाप्रसाद चतुर्वेदीले बताए । पहिरोमा परी मृत्यु भएका अर्का नेपाली दैलेखका दीपक बुढाको पनि पोस्टमार्टम भइसकेको छ । उनको शव पनि आफन्तले बुझेको चतुर्वेदीले बताए ।

उनीहरू सो क्षेत्रमा डकर्मीको काम गर्थे ।