झापा । आजै सरकार विस्तार गर्ने कोशी प्रदेशका मुख्यमन्त्री हिक्मतकुमार कार्कीको तयारी मन्त्रालय भागबण्डामा सहमति नहुँदा ढिलाई भएको छ । मुख्यमन्त्री कार्कीले एमालेको तर्फबाट सरकार विस्तारको लागि तयारी भएपनि माओवादीबाट थप छलफलको माग भएको बताएका छन् ।

नेकपा माओवादी केन्द्र कोशी प्रदेशका इञ्चार्ज हरिबोल गजुरेलले आफ्नो पार्टीले आर्थिक मामिला तथा योजना मन्त्रालय पाउनुपर्ने अडान राखेकोमा सहमति नजुटेपछि आज सरकार विस्तार हुन नसकेको बताए । ‘अर्थ मन्त्रालयमा कुरा मिलेको छैन । अरू सबै विषय मिलिसकेको हो’ उनले भने, ‘आजै मन्त्रीमण्डल विस्तार हुने सम्भावना कम भएको छ ।’

गत वैशाख २७ गते मुख्यमन्त्रीमा नियुक्त मुख्यमन्त्री कार्कीले सोही दिन एमालेबाट रामबहादुर राना मगर र माओवादीबाट गणेश उप्रेतीलाई मन्त्री नियुक्त गरेका थिए । उनीहरुलाई अहिलेसम्म विभागीय जिम्मेवारी दिइएको छैन ।

आर्थिक मामिला मन्त्रालय पाएको खण्डमा आफू मन्त्री हुनुपर्ने भन्दै माओवादी सांसद दुर्गाप्रसाद चापागाईंले पहल गरिरहेका छन् । तर, एमालेले आर्थिक मामिला मन्त्रालय सरकारको नेतृत्व गर्ने दलले नै राख्नु उपयुक्त हुने भन्दै भौतिक पूर्वाधार विकास मन्त्रालय लिन माओवादीलाई आग्रह गरेको छ । एमालेले आर्थिक मामिला एमालेले नै लिनेगरि यसअघि नै करिब सहमति भइसकेको भन्दै माओवादीभित्रको आन्तरिक छलफलको कारण आज सरकार विस्तार हुन नसकेको जनाएको छ ।

माओवादीले आर्थिक मामिला मन्त्रालय नपाए उप्रेतीलाई भौतिक पूर्वाधार विकास मन्त्रालयको जिम्मा दिने संभावना छ । माओवादीले निवर्तमान मुख्यमन्त्री केदार कार्कीको मन्त्रीमण्डलमा समावेश भएकाहरुलाई नै पुनः मन्त्रीमण्डलमा पठाउने तयारी रहेको छ । यसअघि मन्त्री रहेका उप्रेतीसहित राजेन्द्रकुमार कार्की र नारायणबहादुर मगर नै दोहोरिने माओवादीका एक पदाधिकारीले बताए ।

एमालेबाट पनि खोटाङका पाँचकर्ण राई, मोरङका लिलाबल्लभ अधिकारी र झापाका एकराज कार्की मन्त्री बन्ने निश्चित रहेको स्रोतले जनाएको छ । अहिले एउटा मन्त्रालय खाली राख्ने तयारीमा मुख्यमन्त्री छन् । सरकारलाई समावेशी बनाउन केहि राज्यमन्त्री बनाउने तयारी छ । मन्त्रीको आकांक्षी रहेका एमालेका सिर्जना राई र निरन राई राज्यमन्त्री बन्ने संभावना छ ।

यसअघि संविधानको धारा १६८ (३) अनुसार मुख्यमन्त्री बनेका हिक्मतकुमार कार्कीको सरकारमा सहभागी भएकाहरु नै यसपटक एमालेबाट अवसर पाउने भएका छन् । बिहीबार सहमति जुट्न नसकेपनि शुक्रबारसम्ममा सरकार विस्तार हुने मुख्यमन्त्री निकट स्रोतले जनाएको छ ।

नेकपा (एकीकृत समाजवादी) हाल प्रतिपक्षीमा बसेको छ । यस्तै जसपा नेपालकी सांसद निर्मला लिम्बूले पनि आफूलाई मन्त्रीमण्डलमा समावेश गराउनु पर्ने दबाब दिइरहेको बताइएको छ । सोही कारण पनि एक मन्त्रालय खाली राख्नु परेको एमाले स्रोत बताउँछ ।

मुख्यमन्त्री कार्कीले गत वैशाख ३१ गते विश्वासको मत लिएलगत्तै एक हप्तामा मन्त्रीमण्डलले पूर्णता पाउने बताएका थिए । बजेट निर्माण गर्नुपर्ने साथै आर्थिक वर्षको अन्त्यमा बजेट खर्चलाई बढाउनु पर्ने प्रदेश सरकारलाई दबाब छ । सोही कारण पनि मन्त्रीमण्डल विस्तारको काम सकेर बजेट निर्माणमा लाग्ने मुख्यमन्त्रीको तयारी छ ।