बिर्तामोड । राष्ट्रिय स्वतन्त्र पार्टी (रास्वपा) ले आज इलाम–२ को उपनिर्वाचनका लागि औपचारिक उम्मेदवार घोषणा गर्दैछ । रास्वपाले दलबलसहित दिउँसो १ बजे चोक बजारस्थित लाँकुरी चौतारामा उम्मेदवारी घोषणा गर्न लागेको हो ।

रास्वपाले बिहीबार मात्रै इलाम–२ मा मिलन लिम्बुलाई उम्मेदवार बनाउने निर्णय गरेको थियो । उम्मेदवारी घोषणा सभालाई सभापति रवि लामिछाने र उपसभापति डा. स्वर्णिम वाग्ले, संसदीय दलका उपनेता विराजभक्त श्रेष्ठ, सह महामन्त्री कवीन्द्र बुर्लाकोटी, सह–प्रवक्ता रमेश प्रसाई, केन्द्रीय सदस्य  तोसिमा कार्कीलगायतका नेताले सम्बोधन गर्ने छन् । आगामी वैशाख १५ मा हुने उपनिर्वाचनका लागि चैत २४ मा उम्मेदवारी दर्ताको कार्यतालिका छ ।

प्रेस सेन्टर नेपालका केन्द्रीय सचिव लिम्बुले केहि दिन अघि मात्र प्रेस सेन्टरको जिम्मेवारीबाट अलग भएको भन्दै उम्मेदवारी घोषणा गरेका थिए । उपनिर्वाचनको मिति तय भएपछि अध्ययनका लागि केहि दिन अघि इलाम आएका रास्वपा नेताहरुले इलाम–२ का लागि जनजाति उम्मेदवार उपयुक्त हुने निष्कर्ष निकालेको थियो । जनजाति अनुहार खोजीरहेको रास्वपाले बिहीबार लिम्बुलाई समर्थन गर्ने निर्णय गरेको थियो ।