बिर्तामोड । नेकपा एकीकृत समाजवादीका सम्मानित नेता झलनाथ खनाल सरकारको कामप्रति असन्तुष्ट देखिएका छन् । बुधबार बिर्तामोडमा पत्रकारहरुसँग कुरा गर्दै खनालले त्यस्तो असन्तुष्टि व्यक्त गरेका हुन् । 

खनालले सरकारप्रति एकीकृत समाजवादी असन्तुष्ट रहेको बताए । पूर्व प्रधानमन्त्री खनालले सरकारले जनताको चाहनाअनुसार काम गर्न नसकेको आरोप लगाए । ‘सरकारको काममा सन्तुष्ट हुने ठाउँ छैन । सरकारको बजेट र नीतिले जनतालाई छोएको छैन । जसले जनतामा असन्तुष्ट कायमै छ । जनतामा आक्रोश देखा परेको छ,’ उनले भने, ‘हाम्रो दुई मन्त्री छन् । तर, मन्त्रालयमा बजेट छैन,’ उनले भने, ‘गठबन्धन जसरी चल्नुपर्ने त्यसरी चलेन । व्यापक असन्तुष्ट छौँ ।’

उनले पार्टीको आउने महाधिवेशनमा अध्यक्षको उम्मेदवार बन्ने संकेतसमेत गरे । उनले अब जसको नीति हो त्यसकै नेतृत्व हुनुपर्ने भन्दै पार्टी अध्यक्षको उम्मेदवार बन्ने संकेत गरेका हुन् । ‘म व्यक्तिवादी कुरा गर्दिनँ । हाम्रो महाधिवेशनले के नीति पारित गर्छ । त्यसलाई हेर्छौँ । जसको नीति हुन्छ उसले नै नेतृत्व गर्नुपर्छ,’ उनले भने, ‘नीति र नेतृत्वबीच समन्वय हुनुपर्छ ।’ उनले वामपन्थी पार्टीबीच एकता हुनुपर्ने बताए ।

देशमा परिवर्तन चहाने शक्तिहरु एकताबद्ध भएर अघि बढ्नुको विकल्प नरहेको खनालले बताए ।

सुवास नेम्वाङको निधनपछि इलाम–२ को उपनिर्वाचनमा खनालको पनि चर्चा हुँदै आएको छ । खनालले भने आफूले निणर्य गरी नसकेको र उपयुक्त समयमा निणर्य लिने बताए ।