बिर्तामोड । बिर्तामोड उद्योग वाणिज्य संघको आगामी निर्वाचनमा कांग्रेस एक्लै भिड्ने भएको छ । सत्ता गठबन्धनका दलसँगै राष्ट्रिय प्रजातन्त्र पार्टी एमालेसँग मिलेपछि कांग्रेस एक्लिएको हो ।

केहि दिन अघि नै राप्रपा बाहेकका दलहरुले एमालेसँग समिकरण गरिसकेका छन् । उनीहरुले समिति नै निर्माण गरेर काम गरिरहेका छन् । राष्ट्रिय सभाको चुनावमा कोशी प्रदेशमा एमालेसँग चिढिएको राप्रपा आफुतिर आउने अनुमानपनि कांग्रेसको लागि समाप्त भएको छ ।

महासचिव पद कांग्रेसले नदिने भएपछि राप्रपापनि एमालेसहितको टिममा गएको छ ।

अन्य दलहरु एकातिर भएपछि यति बेला नेपाली कांग्रेस निकट व्यवसायीहरु एक्लै भिडन् मुडमा पुगेका छन् ।

विगत चार दिनदेखि वार्ता जारी रहँदा राप्रपाले महासचिव पद नछोडेपछि दुई पार्टीबीच सहमति हुन नसकेको हो । दुवै पार्टीको बटमलाइन महासचिव पद रहेको छ । आफूहरुले राप्रपालाई एउटा उपाध्यक्ष , एउटा सचिव , सहकोषाध्यक्ष र एउटा सदस्य पद दिँदा नमानेको कांग्रेसका एक सदस्यले बताए । बुधबारको वार्तामा राप्रपाले आफूहरुको प्रस्ताव ठाडै अस्वीकार गरेको उनले जानकारी दिए । अबको दुई दिनसम्म राप्रपालाई पर्खिएर त्यसपछि उम्मेदवारको टुंगो लगाउने उनले बताए । त्यसो त कांग्रेस र एमालेसँग बार्गेनिङ गर्दै आएको राप्रपाले महासचिवको उम्मेदवारको रुपमा कृष्ण पौडेलको नाम घोषणा गरिसकेको छ । हालका वरिष्ठ उपाध्यक्ष राजु न्यौपानेलाई अध्यक्षको उम्मेदवार बनाउने निर्णय गरिसकेको कांग्रेसले संजीव घिमिरे, कुशल खतिवडा , विशाल थापा , जीवन खड्का , पुकार बराल , राधिका चुडाल , दीपक मित्तल , राजकुमार शाहलाई उम्मेदवारको रुपमा अघि सार्ने भएको छ । उनीहरुलाई कुन कुन पद दिने भनेर टुंग्याउन बाँकी रहेको जनाइएको छ ।