बिर्तामोड । आज सम्पन्न १९ जना राष्ट्रियसभा सदस्यको निर्वाचनमा नेकपा एमालेलाई चिठ्ठा परेको छ । कोशी प्रदेशबाट महिला तर्फको एमाले उम्मेदवार रुकमणि कोइराला विजयी भएकी छन् । एमालेसँग गठबन्धन गरेको राष्ट्रिय प्रजातन्त्र पार्टीका उम्मेदवार उद्धव पौडेलभने पराजित बने । 

कोइरालाले गठबन्धनको तर्फबाट उम्मेदवार बनेकी नेकपा माओवादी केन्द्रकी चम्पा कार्कीलाई पराजित गरिन् । महिला तर्फका गठबन्धनका मतदातामध्ये ३ प्रदेश सभा र १७ स्थानीय तहका मतदाताले फ्लोर क्रस गर्दा गठबनधनको उम्मेदवार कार्की पराजित बनेकी हुन् ।

अन्य प्रदेशमा भने एमालेले जित हासिल गर्न सकेन ।

नेपाली कांग्रेसबाट कृष्णप्रसाद सिटौला कोशी, आनन्द ढुंगाना मधेश, विष्णुकुमारी सापकोटा लुम्बिनी, विष्णुकुमारी पुडासैनी र जीतजंग बस्नेत बाग्मती, पदमबहादुर परियार र किरणबाबु श्रेष्ठ गण्डकी, कृष्णबहादुर रोकाया कर्णाली, बलदेव बोहरा र नारायणदत्त भट्ट सुदूरपश्चिमबाट विजयी बनेका छन् । नेकपा माओवादी केन्द्रको तर्फबाट झक्कु सुवेदी लुम्बिनी, श्रीकृष्ण अधिकारी बागमती, मनरुपा शर्मा गण्डकी, विष्णुबहादुर बिश्वकर्मा कर्णाली र रेणु चन्द सुदूरपश्चिम प्रदेशबाट विजयी भएका छन् ।

एकिकृत समाजवादीको तर्फबाट दुई जनाले विजय हासिल गरेका छन् । घनश्याम रिजाल बागमती र साबित्री मल्ल कर्णाली प्रदेशबाट विजयी बने ।

त्यस्तै मधेश प्रदेशबाट जनता समाजवादीको तर्फबाट एकमात्र उम्मेदवार पूजा चौधरी विजयी बनिन् ।

राष्ट्रियसभामा पहिलो रहेको एमाले तेस्रोमा झर्यो

जसआगामी फागुन २१ पछि राष्ट्रिय सभामा दलीय हैसियत फेरिने भएको छ । फागुन २१ मा पदावधि सकिने मनोनीत बाहेक १९ सांसदका लागि विहिवार भएको निर्वाचनमा कांग्रेस, माओवादी, एकीकृत समाजवादी र जसपाको गठबन्धनले १८ सिट जितेको छ । जसमा कांग्रेसका १०,  माओवादीका ५, नेकपा एकीकृत मसाजवादीका २ र जनता समाजवादी पार्टीका १ जना निर्वाचित भएका छन् ।

कोशी प्रदेशमा गठबन्धनमा भोटक्रस हुँदा एक सांसद गुमाएपनि राष्ट्रियसभामा सत्तारुढ माओवादी केन्द्र पहिलो दलको रूपमा स्थापित भएको छ । राष्ट्रियसभामा माओवादीका हाल उपाध्यक्षसहित (एक मनोनीत) १६ सांसद रहेका छन् । आगामी फागुन २१ मा ३ जनाको पदावधि सकिने भए पनि निर्वाचनबाट ५ जना निर्वाचित हुँदा राष्ट्रियसभामा माओवादीका १८ सांसद पुग्छ ।

गत वर्षको सम्पन्न प्रतिनिधि सभा सदस्यको निर्वाचनमा ३२ स्थानमा जितेर तेस्रो भएको माओवादी राष्ट्रियसभामा पहिलो स्थानमा पुगेको छ । यता हाल १० सांसदसहित तेस्रो स्थानमा रहेको कांग्रेसका ४ जनाको पदावधि सकिएर घर फर्किँदा पनि निर्वाचनबाट १० थपिँदा १६ जना पुगेका छ । यसअघि तेस्रो स्थानमा रहेको कांग्रेस अब दोस्रो स्थानमा पुग्ने छ । निर्वाचनमार्फत २ सिट जितेको एकीकृत समाजवादीको राष्ट्रिय सभामा उपस्थिति संख्या ८ नै कायम हुने छ ।

आगामी फागुन २१ मा एक सांसदको पदावधि सकिन लाग्दा जसपाले निर्वाचनबाट उक्त सिट स्थान सुरक्षित गरेको छ । राष्ट्रियसभामा पाँचौँ दलको हैसियतमा रहेको जसपाका तीन सांसद छन् । १९ सिटको मत परिणामले राष्ट्रियसभाको पहिलो दल एमालेलाई तेस्रो स्थानमा खुम्च्याइदिएको छ । कोशी प्रदेशको महिलातर्फ अनपेक्षित जित हात पारेको एमालेले आगामी फागुन २१ पछि १० जनामा सीमित हुने देखिएको छ ।