बिर्तामोड । अटिजम भएका बालबालिकाका अभिभावकका लागि प्यारेन्ट चाइल्ड ट्रेनिङ (पीसीटी) झापाको बिर्तामोडमा सम्पन्न भएको छ । न्याय र विकासका लागि सामाजिक सञ्जाल (एसएनजेडी)ले पहिलो पटक आयोजना गरेको अढाई महिने तालिम बिहीबार सम्पन्न भएको हो ।

अटिजम भएका बालबालिकाका अभिभावकहरुले बालबालिकासँग कस्तो व्यवहार गर्नु पर्छ, बालबालिकाको व्यवहारमा परिवर्तन ल्याउन के गर्नु पर्छ भन्ने ज्ञान दिन तालिम आयोजना गरिएको कार्यक्रम संयोजक कुमार चुडालले जानकारी दिए । अटिजम भएका बालबालिकाहरुको सामान्य बालबालिकाभन्दा भिन्न व्यवहार हुने हुँदा अभिभावकहरुका लागि तालिम आवश्यक हुन्छ । पीसीटी तालिम ललितपुरको हरिसिद्धीमा अटिजम केयर सोसाइटीले मात्र सञ्चालन गर्ने हुँदा अभिभावकहरुलाई त्यहाँ गएर तालिम लिन महंगो र असहज हुने भएका कारण झापामा तालिम गराउन पहल गरिएको कार्यक्रम संयोजक चुडालले बताए ।

पीसीटी तालिम सञ्चालन गर्न सन् २०२४ को डिसेम्बरसम्मका लागि अष्ट्रेलियन दुताबाससँग सम्झौता भएको उनले बताए । एक व्याचमा पाँच जना अटिजम भएका बालबालिकासहित अभिभावकलाई तालिम दिइने र तालिमका लागि दुई जना प्रशिक्षक रहेको उनले जानकारी दिए । चुडालका अनुसार ती प्रशिक्षकहरुलाई पनि छात्रवृत्ति दिएर पढ्न पठाएको थियो भने अहिले दुई जनालाई डिप्लोमा कोर्षका लागि छात्रवृत्ति दिएर पढ्न पठाएको छ ।

कार्यक्रममा सहभागी अभिभावकहरुले तालिम पश्चात पुनः बालबालिकाहरु घरमा नै बस्दा व्यवहार परिवर्तनमा समस्या हुने भएकाले राज्यले नै थेरापी सेन्टर सञ्चालन गर्नुपर्ने बताए । निजी थेरापी सेन्टरमा बालबालिकाहरुको उपचार गर्न अत्यन्त महंगो हुने, एक जना अभिभावक बालबालिकासँगै हुनु पर्ने भएकाले खर्च धान्न गाह्रो हुने हुँदा राज्यले नै व्यवस्था उनीहरुले माग गरेका छन् ।

झापाको बिर्तामोडस्थित महेन्द्ररत्न मावि र दमकको सरस्वती माविमा अटिजम भएका बालबालिकाका लागि सामान्य स्रोत कक्षा सञ्चालनमा रहेका छन् । तर, राज्यले आवश्यक पूर्वाधार निर्माण र जनशक्ति व्यवस्थापन गर्न नसक्दा ती केन्द्रहरु व्यवस्थित रुपमा सञ्चालित हुन सकेका छैनन् । ती केन्द्रहरुमा पनि एसएनजेडीले सहजीकरण र सहयोग गर्दै आएको छ ।