बिर्तामोड । मंसिर ७ गते राजधानीमा दुर्गा प्रसाईँ र एमाले कार्यकर्ता आमने सामने हुने भएका छन् । दुर्गा प्रसाईले मंसिर ७ गते वृहत नागरिक मुक्ति आन्दोलन भन्दै काठमाडौंमा नागरिक भेला पार्ने कार्यक्रम तय गरेका छन् ।

उता, एमाले निकट राष्ट्रिय युवा संघ नेपालले पनि मंसिर ७ गते नै माइतीघर मण्डलामा ‘समाजमा बढ्यो अराजकता’ माइतीघर जाऔं भन्दै जुलुस निकाल्ने भएको छ । प्रसाईँले पछिल्लो समय ‘राष्ट्र, राष्ट्रियता धर्म संस्कृति र नागरिक बचाउ’ अभियान मार्फत नेताहरुमाथि गालीगलौज गर्दै आईरहेका छन् ।

कुनै बेला प्रचण्डका प्रिय पात्र रहेका प्रसाई एमाले र माओवादी मिलेर नेकपा बन्दा ओली–प्रचण्डलाई मार्सी चामलको भात खुवाएर चर्चामा आएका थिए । प्रचण्डलाई छाडेर एमाले अध्यक्ष ओलीको नजिक पुगेका प्रसाईँलाई एमालेले चितवन महाधिवेशनमा प्रतिनिधी र त्यसपछि केन्द्रिय सदस्य मनोनित गरेर अर्थ विभागको उपप्रमुख नै बनाएको थियो ।

तर धर्म निरपेक्षता हटाउने र राजतन्त्र फर्काउने भन्दै अभियान सुरु गरेपछि एमालेले प्रसाईँलाई कारवाही गरेको थियो ।

पत्रकार सम्मेलन गरेर प्रसाईँ जमलस्थित होटल एल्लो प्यागोडाबाट बाहिरिँदै गर्दा एमाले निकट राष्ट्रिय युवा संघका कार्यकर्ताले कालोमोलो दलेका थिए । त्यसको बदलास्वरुप प्रसाईँले झापामा एमाले नेता तथा पूर्व मन्त्री महेश बस्नेतको कार्यक्रममा अवरोध गर्दै गाडीमा तोडफोड गरेका थिए । त्यसपछि एमाले र दुर्गा प्रसाईँबीचको झगडा थप तनाबपूर्ण बन्दै गएको छ ।

प्रसाईँले एमाले अध्यक्ष केपी ओलीले कम्बोडियाको टेलिकममा ठूलो रकम लगानी गरेको आरोप लगाएपछि ओली र एमाले उनीसँग थप चिढिएका छन् ।

मंसिर ७ गते प्रसाईँले काठमाडौं आउन नागरिकहरुलाई आव्हान गरेका छन् भने एमाले निकट युवा संघले पनि माइतीघरमा प्रदर्शनको कार्यक्रम राखेका छ । यसैबीच प्रधानमन्त्री पुष्पकमल दाहाल ‘प्रचण्ड’ले सुरक्षा निकायका प्रमुखहरुसँग छलफल गरेर मुलुकको सुरक्षा अवस्थाबारे ब्रिफिङ लिएका छन् ।

लोकतन्त्रका विरुद्ध औँला उठाउनेलाई औँला तल झार्ने एमाले अध्यक्ष ओलीको चेतावनी

यता नेकपा एमालेका अध्यक्ष केपी शर्मा ओलीले मङ्सिर ७ गते युवा विद्यार्थीले गर्ने प्रदर्शनमा पार्टीको साथ समर्थन रहेको बताएका छन् । शनिवार काठमाडौँमा पार्टीको एक कार्यक्रममा बोल्दै ओलीले ७ गते शान्तिपूर्ण रूपमा सरकारलाई शक्ति देखाउने बताए ।

उनले सो दिन सरकार र दक्षिणपन्थी शक्तिहरूलाई थोरै सङ्केत मात्र गर्ने बताउँदै  शान्तिपूर्ण राजनीतिको रूपमा राजनीतिक प्रदर्शन गर्ने बताए । उनले लोकतन्त्रका विरुद्ध औँला उठाउनेलाई शान्तिपूर्ण रूपमा औँलो तल झारिदिने बताए ।

ओलीले भने–‘हामीले यातना सहेर, अङ्गभङ्ग भएर, जेलनेल सहेर ल्याएको लोकतन्त्र हो यो । बेघरबार भएर, बेहालका अनेक स्थितिहरू झेलेर ल्याएको हो, त्यस कारण लोकतान्त्रिक गणतन्त्रलाई चलाउने र औँलो ठड्याउने काम कतैबाट नहोस् भनेर म चेतावनीको भाषामा भन्न चाहन्छु । लोकतन्त्रको विरुद्ध लड्ने कुरा त छोड्दिऊँ, लोकतन्त्रको विरुद्ध औँलो ठड्यायो भने त्यो औँलो कसरी तल झार्नुपर्छ शान्तिपूर्ण तरिकाले हामी तल झार्दिन्छौँ ।’

युवा विद्यार्थी अगाडि रहेर गरिने सो प्रदर्शनमा निषेधाज्ञा भने नतोड्ने बताए । साथै सरकारले रुट तोकेमा सोही रुटमा प्रदर्शन गर्न पनि उनले कार्यकर्ताहरूलाई निर्देशन दिए । उनले पुगेसम्म रातो टोपी लगाउन, सबैलाई झन्डा बोकेर प्रदर्शन गर्न निर्देशन दिए ।