बिर्तामोड । कोशी प्रदेशका मुख्यमन्त्री केदार कार्कीले मन्त्री परिषद गठन गरेका छन् । एमाले सांसदको समर्थनमा मुख्यमन्त्री बनेका कार्कीले आइतबार मन्त्री परिषद विस्तार गरेका हुन् ।

नव गठित मन्त्री परिषदमा इलामका दुई जना मन्त्री बनेका छन् । इलामका सांसदद्वय रामबहादुर राना र शम्शेर राई कार्की क्याबिनेटमा समेटिएका छन् । 

शनिबार मुख्यमन्त्रीमा नियुक्त भएका कार्कीले आइतबार मन्त्री परिषद विस्तार गरेका हुन । कार्कीले इलामका कांग्रेस सांसद राई र एमाले सांसद रानालाई मन्त्रीमा नियुक्त गरेका छन् । यसअघि उद्धव थापाले ओखलढुंगाका दुई जना सांसदलाई मन्त्री बनाएका थिए ।

संविधानको धारा १६८ -५_ अनुसार कांग्रेसका ८ र एमालेका ३९ जना सांसदको समर्थनमा कार्की मुख्यमन्त्री भएका हुन् । कांग्रेसका सांसदहरु कांग्रेस नेता शेखर कोइराला निकटका हुन् । प्रदेश प्रमुख पर्शुराम खापुङले सरकार गठनका लागि आह्वान गरेदेखि नै कोइरालाले मुख्यमन्त्री कार्कीलाई बनाउन लबिङ गर्दै आएका थिए । शनिबार मात्रै प्रधानमन्त्री पुष्पकमल दाहाल, कांग्रेस सभापति शेरबहादुर देउवा र कोइरालाबीच सत्तारुढ गठबन्धनलाई मजबुत बनाउने सहमति गरेका थिए । एमालेले कार्कीसँग तीन विषयमा सहमति भएको र त्यसमा सरकारमा सहभागिताको विषय समेत रहेको जनाएको छ । उनीहरुले कार्की आफ्नो प्रतिबद्धतामा इमान्दार रहेसम्म समर्थन गर्ने जनाएका छन् ।