विराटनगर । नेपाली कांग्रेस कोशी प्रदेशमा किचलो भएको छ । मुख्यमन्त्रीको बिषयलाई लिएर कांग्रेसमा किचलो भएको हो ।

गठबन्धनले कोशीको मुख्यमन्त्रीमा नेकपा माओवादीका सांसद इन्द्रबहादुर आङ्बोलाई समर्थन गर्ने निर्णय गरेसँगै कांग्रेसका शेखर पक्ष असन्तुष्ट भएको थियो । शेखर पक्षका नेपाली कांग्रेसका सांसद ज्ञानेन्द्र कार्कीले पार्टीको निर्णय विपरित एमालेका सांसदहरुको हस्ताक्षरसहित मुख्यमन्त्रीमा दाबी गरेसँगै कांग्रेसभित्र किचलो शुरु भएको हो ।

कार्कीले एमालेका सांसदसहितको समर्थनमा प्रदेश प्रमुखसमक्ष बिहीबार मुख्यमन्त्रीमा दाबी पेस गरेका हुन् । 

कार्कीलाई एमालेका ३९ र कांग्रेसका ८ सांसदसहित ४७ सांसदको समर्थन रहेको दाबी गरिएको छ ।

यस्तै सत्ता गठबन्धनबाट माओवादी केन्द्रका आङ्बोले मुख्यमन्त्रीमा दाबी पेस गरेका छन् । योसँगै कार्कीको दोहोरो हस्ताक्षर भएको छ ।

यसैबीच कांग्रेसका ८ सांसदले प्रदेश प्रमुख अगाडि नै हस्ताक्षर गरेका छन् । उनीहरुले आङ्बोको दाबी खारेज गर्नपनि आग्रह गरेका छन् ।