काठमाण्डौ । प्रधानमन्त्री पुष्पकमल दाहाल ‘प्रचण्ड’ले पूर्वमाओवादीहरू छिट्टै एकतामा आउने बताएका छन् । पार्टीनिकट विद्यार्थी संगठन अनेरास्ववियु (क्रान्तिकारी)ले आयोजना गरेको कार्यक्रममा बोल्दै प्रधानमन्त्री प्रचण्डले माओवादीहरू छिट्टै एकैठाउँमा आउने र ०६४ को भन्दा शक्तिशाली पार्टी बन्ने दाबी गरेका हुन् ।

पार्टीका अध्यक्षसमेत रहेका उनले उनले माओवादी विभाजित हुँदा आन्दोलन  र त्यसले स्थापित गरेको व्यवस्था नै कमजोर बनेको बताउँदै छिट्टै एउटै पार्टी बन्ने बताए ।

‘हेर्दै जानुहोला सबै माओवादीहरू एउटै केन्द्रमा आउँछन् सबै संगठनहरू एउटै केन्द्रमा बन्नेछन् । र, पहिलाभन्दा धेरै परिपक्व हुन्छ,’ उनले भने, ‘एकता भएपछि हामी ०६४ को भन्दा बलियो हुन्छौं। र एउटा नयाँ परिस्थिति बन्छ ।’

अध्यक्ष प्रचण्डले पार्टी र नेतृत्वविरूद्ध घेरा हाल्ने, भ्रम फैलाउने र सखाप पार्ने सामन्ती प्रवृत्ति अझै कायम रहेको र त्यसकाविरूद्ध पार्टी निरन्तर लडाइँमै रहेको बताए ।

‘हिजो बन्दुकद्वारा वर्गसंघर्ष हुन्थ्यो । बन्दुक केन्द्रबिन्दुमा हुन्थ्यो अहिले संगठन विचार र प्रचार केन्द्रविन्दुमा छ। उद्धेश्य त्यही नै हो,’ उनले भने ।

उनले विचार, राजनीतिक मुद्दा, नेतृत्व र इतिहासको कर्मको बलमा ३२ सिटमात्रै भएपनि  देशको राजनीतिको केन्द्रबिन्दुमा रहेको बताए ।

‘अहिले राज्यको बागडोर हाम्रै हातमा घुमिफिरी आएको छ । यो त्यत्तिकै आएको होइन। संख्याको बलमा मात्रै होइन इतिहासको तागतको बलमा हामी यहाँ छौं । र यो अरूलाई पचिरहेको छैन,’ उनले भने ।

त्यसमाथि यसपटक राम्रोबाहेक नराम्रो नगर्ने भनेर काम सुरू गरेपछि प्रतिक्रियावादीहरुको निदहराम भएको बताए ।

‘भ्रष्टाचार  र कुशासन र बेथितिविरूद्ध सुरू गरेको लडाईँविरूद्ध चालिएको कदम प्रतिक्रियावादीलाई मन परेको छैन,’ उनले भने, ‘तर हामीले एकपछि अर्को ब्याटल अगाडि बढाउँदै लगेपछि उनीहरू हैरान परेसान छन्, विक्षिप्त छन् ।’

उनले भ्रष्टाचारविरूद्धको लडाइँ सुरू गरेपछि भ्रष्टाचारका होहल्ला गरेर जनतामाझ भ्रम सिर्जना गर्ने हावा र उनीहरूको बेलुन फुटेको बताए । ‘साँचो अर्थमा  यो लडाइँको नेतृत्व कसले गर्न सक्छ भन्नेकुरा फेरि स्थापित हुन पुगेको छ,’ उनले भने ।