मेचीनगर । झापाको मेचीनगर नगरपालिकाका जनप्रतिनिधिले नगरका प्रमुख प्रशासकीय अधिकृतलाई हाजिर गर्न रोक लगाएका छन् । काजमा पुस १२ गते मन्त्रालय गएका प्रमुख प्रशासकीय अधिकृत राजकपुर चम्लागाई सोमबार कार्यालय आउँदा नगरउपप्रमुख मिना उप्रेतीसहित वडा अध्यक्ष, कार्यपालिका सदस्य र वडा सदस्यहरुले हाजिर गर्न नदिएका हुन् ।

करीब ११ बजे कार्यालय पुगेर कार्यकक्षमा प्रवेश गर्नु भएका चम्लागाईलाई हाजिर हुन दिइएन । हाजिर नगरी कार्यालयबाट गइदिन उपप्रमुख उप्रेतीले प्रमुख प्रशासकीय अधिकृत चम्लागाईलाई अनुरोध गरिन् । उपप्रमुख उप्रेतीले आफ्नै कार्यकक्षमा बोलाएर प्रमुख प्रशासकीय अधिकृत चम्लागाईलाई भनिन्, ‘कार्यपालिका बैठकले तपाईलाई फिर्ता पठाउने निर्णय गरेकाले तपाईले अहिले हाजिर नगरिदिनु ।’

आफ्नो सरुवा नभएको र काज पनि सकिएकाले आफूलाई हाजिर गर्न दिन चम्लागाईले उपप्रमुख उप्रेतीसंग पटक पटक अनुरोध गर्दा पनि उपप्रमुख उप्रेतीले चम्लगाईको कुरा सुनुवाई गर्न मानिनन् । ‘मेरो कार्यालय यही हो,’ चम्लागाईले उपप्रमुखसँग भने, ‘अन्यत्र सरुवा पनि भएको छैन, सरुवा नभएसम्म मलाई हाजिर हुन दिनुहोस ।’

केही बेर उपप्रमुख र अन्य जनप्रतिनिधिबीच छलफल पछि नगरप्रमुख काठमाण्डौ गएको र अपरान्ह बैठक बसेर थप छलफल गर्ने भन्दै उपप्रमुख उप्रेतीले तत्काल हाजिर नगर्न अनुरोध गरे पछि चम्लागाई कार्यालयबाट बाहिरिएका थिए ।

यस अघि कार्यपालिकालाई असहयोग गरेको भन्दै पुस १८ गतेको नगर कार्यपालिकाको बैठकले प्रमुख प्रशासकीय अधिकृत चम्लागाईबाट नगरको बजेट खर्च गर्ने अधिकार स्थगन गर्ने निर्णय गरेको थियो ।

चरम राजनीतिक चलखेल हुँदै आएको मेचीनगर नगरपालिकामा प्रमुख प्रशासकीय अधिकृत लामो समय टिक्न नसक्ने भएका कारण अधिकृतहरुसमेत सो पालिकामा आउन नमान्ने गरेको बताइन्छ ।