विराटनगर । केन्द्रमा राजनीतिक समीकरण बदलिएसँगै प्रदेश प्रमुख हुन एमालेका पुराना नेताहरुको नाम चर्चामा छ ।

प्रदेश प्रमुखसमेत परिवर्तन गर्नेगरी सत्तारुढ गठबन्धनले तयारी गरेपछि प्रदेश १ का पुराना नेता गोपाल गुरागाईं र माओवादी हुँदै एमालेमा प्रवेश गरेका इन्द्रजित राईसमेतले इच्छा व्यक्त गरेका छन् ।

२०४८ सालको निर्वाचनमा सूर्यबहादुर थापालाई धनकुटाबाट हराएर चर्चामा आएका गोपाल गुरागाईं प्रदेश १ का पुराना नेता हुन् । ७५ वर्ष पुगेका गुरागाईं विभिन्न सामाजिक अभियानमा समेत जोडिएका एमालेका नेता हुन् । गुरागाईंले भने ‘म अब चुनाव लड्न पनि सक्दिन ।आफूलाई मिल्दोजुल्दो जिम्मेवारी आए लिन इच्छुक छु, तर यसमा नेतृत्वको के विचार छ हेरौं ।’

त्यस्तै सैन्य विज्ञ हुँदै नेकपा माओवादीले संविधानसभा सदस्यसमेत बनाएको भोजपुरका इन्द्रजित राई पनि प्रदेश प्रमुख हुन इच्छा व्यक्त गरेको एमाले स्रोतले बताएको छ । उनी पछिल्लो समय एमालेमा प्रवेश गरेका माओवादी नेता रामबहादुर थापा (बादल)सँगै एमालेमा आएका हुन् । एमालेका अर्का पुराना नेता गुरु बरालको नाम समेत चर्चामा आएपनि उनले आफू उक्त पदमा नजाने र कुनै पनि इच्छा नभएको बताए । उनले भने, ‘मलाई इच्छा छैन ।’

७ वटा प्रदेशमा अहिले जसपा, नेकपा माओवादी, काँग्रेस र नेकपा एकीकृत समाजवादीको भागबण्डामा प्रदेश प्रमुख छन् । गठबन्धन फेरिएसँगै एमालेले प्रदेश प्रमुख पनि फेरबदल चाहेको छ ।