बिर्तामोड । प्रतिनिधिसभा तथा प्रदेशसभा निर्वाचन २०७९ को मत परिणामबाट १० जना नयाँ अनुहारहरु माननीय बनेका छन् । पाँच जना पुराना अनुहार दोहोरिएका छन् ।

नेपाली कांग्रेसबाट प्रतिनिधिसभा तर्फ विश्वप्रकाश शर्मा र प्रदेशसभा तर्फ गोपाल तामाङ र भुमिप्रसाद राजवंशी निर्वाचित भएका छन् । शर्मा निर्वाचन क्षेत्र नम्बर १ बाट, गोपाल तामाङ प्रदेश १ (१) बाट र भुमिप्रसाद राजवंशी क्षेत्र नम्बर ३ (१) बाट निर्वाचित भएका छन् ।

त्यस्तै नेकपा एमालेबाट प्रतिनिधिसभातर्फ क्षेत्र नम्बर २ बाट विजयी भएका देवराज घिमिरेपनि नयाँ अनुहार हुन् । प्रदेशसभा तर्फ क्षेत्र नम्बर २(२) का तिलचन (चिन्तन) पाठक, क्षेत्र नम्बर ३ (२) बाट छबिलाल चुडाल, क्षेत्र नम्बर ४ (१) बाट राधाकृष्ण खनाल, क्षेत्र नम्बर ५ (२) बाट होमबहादुर थापा माननीय हुने नयाँ अनुहार हुन् ।

राष्ट्रिय प्रजातन्त्र पार्टीबाट प्रदेशसभा सदस्यमा विजयी क्षेत्र नम्बर १ (२) की सबिना बजगाई र क्षेत्र नम्बर ४ (२) का भक्तिप्रसाद सिटौलापनि माननीय हुने नयाँ अनुहार हुन् ।

प्रतिनिधिसभा सदस्यमा विजयी राप्रपाका राजेन्द्र लिङ्देन, लालप्रसाद साँवा लिम्बू, केपी शर्मा ओली र प्रदेशसभा सदस्य निर्वाचित क्षेत्र नम्बर २ (१) का एकराज कार्की र क्षेत्र नम्बर ५ (१) का हिक्मतकुमार कार्की भने माननीय भइसकेका व्यक्ति हुन् ।