बिर्तामोड । ललितपुर क्षेत्र नम्बर ३ बाट प्रतिनिधिसभा सदस्य पदमा स्वतन्त्र उम्मेदवारी दिएका डा. तोसिमा कार्की आफ्नो उम्मेदवारी खारेजी विरुद्ध अदालत जाने भएकी छिन् । उनले आफ्नो क्षेत्रमा राम्रो माहौल सिर्जना भइरहको अवस्थामा निर्वाचन परिणाम फरक पार्ने गरि निर्वाचन आयोगले उम्मेदवारी खारेज गर्ने निर्णय गरेको भन्दै अदालत जाने बताएकी हुन् ।

डा. कार्की आफू प्रतिनिधिसभा सदस्य पदका लागि उम्मेदवार बन्न लागेको र हाल नेपाल मेडिकल काउन्सिलको सदस्य रहेको हुँदा सो पद लाभको भए/नभएको निर्क्यौल गरिदिन भन्दै भदौ २८ गते निर्वाचन आयोगमा निवेदन दिएकि थिइन् ।

डा. कार्कीले आयोगमा दिएको निवेदन

तर, आयोगले कुनै जवाफ नदिएपछि कार्कीले ललितपुर ३ बाट उम्मेदवारी दिएर निर्वाचन कार्यक्रमलाई तिब्रता दिइरहेको बेला कात्तिक १२ गते बसेको निर्वाचन आयोगको बैठकले डा. कार्की बहाल रहेको मेडिकल काउन्सिलको पद लाभको भएको भन्दै उम्मेदवारी खारेजी गर्ने निर्णय गरेको छ । कार्कीले सामाजिक सञ्जालमार्फत ‘समयमा आफ्नो निवेदनमा प्रष्ट नपारेको र दावी विरोध गर्ने समयसकिए पछि परेको उजुरीलाई आधार मानेर निर्णय गर्नुमा निर्वाचन आयोगको निष्पक्ष निर्णय हो भन्नेमा शंका गर्दछु,’ उल्लेख गरेकी छिन् । 

दाबी विरोध गर्ने समय सकिएपछि डा. कार्कीविरुद्ध निर्वाचन अधिकृतको कार्यालय ललितपुरमा उजुरी परेको थियो । कार्यालयले सोधेको स्पष्टिकरणमा डा. कार्कीले आफू बहाल रहेको नेपाल मेडिकल काउन्सिलको पदमा नियमित सरकारी तलब नआउने भएकाले लाभको नभएको जिकिर गरेकी थिइन् ।