बिर्तामोड । नेकपा एमालेका स्थायी कमिटी सदस्य तथा प्रदेश १ इञ्चार्ज एवम् झापा क्षेत्र नम्बर २ का प्रतिनिधिसभा सदस्य पदका उम्मेदवार देवराज घिमिरेले महाकाली सन्धि राष्ट्रहितमा रहेको बताएका छन् । बुधबार बिर्तामोडमा आयोजित सम्पादकसँग उम्मेदवारहरु नामक अन्तरक्रिया कार्यक्रममा बोल्दै घिमिरेले महाकाली सन्धि नेपाल राष्ट्रको अहितमा नरहेको बताएका हुन ।
कार्यक्रममा सञ्चारकर्मीहरुको प्रश्नको उत्तर दिँदै घिमिरेले भने–‘जुन महाकाली सन्धि पारित भएको छ त्यो महाकाली सन्धि नेपाल राष्ट्रको अहितमा छैन, त्यसले राष्ट्रियता माथि समस्या ल्याएको छैन ।’ महाकाली सन्धिले उल्टै सन्धिले महाकाली नदिलाई साझा नदिको रुपमा स्थापित गरेको र एकलौटी प्रयोग गरिरहेको पानीमा अधिकार स्थापित गरेको घिमिरेले बताए । उनले पञ्चेश्वर परियोजनाको लागत कसले व्यहोर्ने, त्यसको डीपीआर तयार गर्ने, पास गर्ने र त्यो डीपीआर अनुसारको परियोजना निर्माण नहुँदा सन्धि कार्यान्वयनमा नआएको बताए । सन्धि कार्यान्वयनमा नआउनुको मतलब त्यो ठीक भएको र त्यो प्रयोगमा नजानु चाँहि गलत भएको उनले दोहोर्याए ।
घिमिरेले बहुउद्धेश्यीय पञ्चेश्वर परियोजना कार्यान्वयनमा गएको भए राष्ट्र धेरै अगाडी बढिसकेको हुने धारणा व्यक्त गरे ।
तत्कालिन समयमा नेकपा एमालेभित्र महाकाली सन्धिको बिषयलाई लिएर ठूलो अन्तरविरोध भएको थियो । सन्धिको पक्ष र बिपक्षमा पार्टीभित्र विवाद हुँदा घिमिरेको मत निर्णायक बनेको थियो । मनमोहन अधिकारी बिरामी भएका कारण पार्टीको पहिलो बरियताक्रममा रहेका बैकल्पिक केन्द्रीय सदस्यको हैसियतले घिमिरेले सन्धिको पक्षमा निर्णायक मत हालेका थिए ।
पछिल्लो समय एमाले अध्यक्ष केपी शर्मा ओलीले महाकाली सन्धि गल्ती भएको स्वीकार गरिसकेका छन् ।
२०५२ साल माघ २९ गते नेपाल र भारत सरकारका प्रतिनिधीले हस्ताक्षर गरेको पञ्चेश्वर परियोजनासहितको एकिकृत महाकाली सन्धि २०५३ साल असोज ३ गते संसदको दुवै सदनको संयुक्त बैठकले अनुमोदन गरेको थियो ।
कार्यक्रममा बोल्दै नेता घिमिरेले गठबन्धन दलको तर्फबाट आफ्नो प्रतिष्पर्धीको रुपमा रहेका हरिकुमार राना सहिसलामत छन् कि बिरामी छन् भन्दै आश्चर्य व्यक्त गरे । राना धानको बिचमा सामा भएको भन्दै उनको पक्षमा जनमत नभएको बताए ।
क्षेत्र नम्बर २ (१) का उम्मेदवार एकराज कार्कीलाई अघिल्लो कार्यकालमा बिर्तामोडलाई बन्दमुक्त क्षेत्र घोषणा गर्ने, यहाँ रहेका खोलाहरु तटबन्धन गर्ने लगायत प्रतिबद्धता पूरा नगरी फेरी उम्मेदवारी दिँदा तपाईको लोकप्रियता के रहन्छ ? भन्ने प्रश्नमा कार्कीले आफूले प्रतिबद्धता गरेका कुराहरु करिब करिब पूरा गरिसकेको बताए । उनले गरामनीलाई बन्दमुक्त क्षेत्र बनाएको र बिर्तामोडलाई पनि बन्दमुक्त क्षेत्र बनाउने कुरामा विभिन्न पहलहरु भएपनि सफल हुन नसकेको बताए । उनले मुलुक समृद्धिको अभियानमा अगाडी बढिसकेकाले बन्द गर्नु जरुरी नभएको र यहाँका सरोकारवालाहरुसँग छलफल गरेर बन्दमुक्त क्षेत्र बनाउने कुरा गर्न सकिने धारणा राखे ।
प्रदेशको बजेट थोरै भएको र करिब दुई बर्ष कोरोना संक्रमणका कारण काम गर्न नसकिएको बताउँदै रेखा, देउनिया, हर्चना, भुसुडीलगायतका खोलाहरुमा करिब ६ करोडको तटबन्धन गरेको बताए ।
त्यस्तै प्रदेश २ (२) का प्रदेशसभा सदस्यका उम्मेदवार तिलचन (चिन्तन) पाठकलाई ‘हारको पर्याय’ भनेर भनिन्छ नि भन्ने जिज्ञासामा आफू संसदीय अभ्यासमा पहिलो पटक अघिल्लो स्थानीय तहको निर्वाचनमा चुनाव लडेको र झिनो मतले हार व्यहोर्नु परेको बताए । एक पटक हार्दैमा हारको पर्याय नै भन्न नहुने र सँधै पराजय नहुने बताए ।