बिर्तामोड । यातायात क्षेत्रमा लामो समयदेखि काम गर्दै आएका मेचीनगरका विदुरकुमार खतिवडा आगामी मंसिरमा हुने भनिएको संघीय निर्वाचनमा झापा क्षेत्र नं १ बाट उठ्ने भएका छन् ।

शान्तिनगरका स्थायी बासिन्दा खतिवडा हाल मेचीनगर–६ काँकरभिट्टामा बस्दै आएका छन् । खतिवडाले आगामी संघीय निर्वाचनमा स्वतन्त्र उम्मेद्वार बनेर झापा क्षेत्र नंं १ को चुनावी मैदानमा उत्रिने तयारी गरेका हुन् ।

उनले सामाजिक सञ्जाल फेसबुकमार्फत आफ्नो स्वतन्त्र उम्मेद्वारी घोषणा गरेका हुन् । उनले राजनीतिक दलका नेताहरुले सपना मात्रै बाँडेको भन्दै आफ्नो उम्मेद्वारी जनताको परिवर्तनका लागि हुने बताए । आफ्नो उम्मेद्वारी घोषणासँगै उनले विभिन्न सामाजिक व्यक्तिहरुसँगको भेटघाटलाई अगाडि बढाएका छन् ।

‘राजनीतिक दलका नेताहरुको कार्यशैली देखेर जनता दिक्क भएका छन्,’ ४६ वर्षीय खतिवडाले भने, ‘चुनाव जितेर फेरि गाउँ नपुग्ने नेताका कारण जनताले नयाँ विकल्प खोजिरहेका छन् । त्यसका लागि म उभिएको छु । जहाँ जे समस्या छन्, ती समस्यालाई सम्बोधन गर्न म तयार छु ।’

०४९ सालदेखि उनी यातायात क्षेत्रमा क्रियाशील छन् । सुरुमा खतिवडाले बस चालक भएर काम गरे । लामो समय बस चालकको रुपमा काम गरेपछि उनी ७० सालदेखि यातायात क्षेत्रका विभिन्न संघसंस्थामा नेतृत्वदायी भूमिकामा सक्रिय बने ।

यातायात व्यवसायी र मजदुरका हकहितका निम्ति खतिवडा सक्रिय भएर लागे । मातृभूमि भलाई एण्ड इन्भेसमेन्ट कम्पनी प्रालिको क्षति मूल्यांकन समितिको संयोजक भएर जिम्मेवारी निर्वाह गरिसकेका खतिवडा हाल बुद्धशान्ति यातायात एण्ड अटो प्रालिका प्रबन्ध निर्देशकको रुपमा कार्यरत छन् ।

झापामा यातायात क्षेत्रको सिन्डीकेट हटाएर प्रालि दर्ता गरेर गाडी सञ्चालन गराउने कुरामा खतिवडाको ठूलो पहल रहेको यातायातकर्मीहरु बताउँछन् ।

राजनीतिक दलका उम्मेदवार चुनाव अघि विभिन्न प्रलोभनमा पारेर भोट माग्ने तर चुनाव जितेपछि व्यवहार परिवर्तन गर्ने गरेका कारण मतदाताले परिवर्तन खोजेको र जनताको सेवक भएर काम गर्न आफू तयार भएको खतिवडा बताउँछन् । जनताको आवश्यकता पहिचानका लागि विभिन्न व्यक्तिहरुसँग छलफल तथा अन्तरक्रिया गर्ने तयारीमा आफू लागेको खतिवडाको भनाई छ ।