बिर्तामोड । बिर्तामोडको भद्रपुर रोडस्थित सनसाइन मेडिसिन सेन्टरले बालबालिकाहरुको निःशुल्क स्वास्थ्य परिक्षण गरेको छ । सेन्टरले शनिबार एक दिने निःशुल्क स्वास्थ्य शिविर सञ्चालन गरेको हो ।

नवजात शिशु तथा बालरोग विशेषज्ञ डाक्टर केशवकुमार मण्डलले बालबालिकाको स्वास्थ्य परिक्षण गरेका थिए । समाजमा परोपकारी काम गर्ने उद्धेश्यले शिविर सञ्चालन गरिएको मेडिसिन सेन्टरका सञ्चालक प्रबिन पराजुलीले बताए । शिविरमा ३० जना बालबालिकाको स्वास्थ्य परिक्षण गर्नुका साथै निःशुल्क औषधीसमेत वितरण गरिएको उनले बताए ।

सप्तरी मुल घर भएका डा. मण्डलले धरानको बीपी कोइराला स्वास्थ्य विज्ञान प्रतिष्ठानबाट एमबीबीएस र काठमाण्डौ युनिभर्सिटीबाट एमडी गरेका छन् । विगत छ बर्षदेखि नवजात शिशु तथा बालरोग विशेषज्ञको रुपमा कार्यरत डा. मण्डलले बिर्तामोडस्थित कनकाई हस्पिटल, झापा नेशनल हस्पिटल र सनसाइन मेडिसिन सेन्टरमा सेवा दिँदै आएका छन् ।

शिविरमा सिजनल फ्लुका बिरामी बढी आएको डा. मण्डलले बताए । उनले धेरैजसो बिरामीले मेडिकलबाट स्वास्थ्यकर्मीको परामर्शमा एण्टिबायोटिक खुवाइसकेर अन्तिममा बिशेषज्ञ डाक्टरकोमा आइपुग्ने बताए । उनले बिरामीलाई शुरुमै एण्टिबायोटिक चलाउन नहुने बताउँदै धेरैजसो अस्पताल तथा मेडिकलमा अनावश्यक स्वास्थ्य परिक्षण गराउने गरेका कारण अभिभावक हैरान भएको बताए । बालबालिकाहरुको स्वास्थ्य समस्या संवेदनशिल हुने बताउँदै औषधी शुरु गर्नुअघि विशेषज्ञ डाक्टरको परामर्श लिन अनुरोध गरे ।

स्वास्थ्य शिविरमा अधिकांश औषधीसमेत निःशुल्क वितरण गरिएको सञ्चालक पराजुलीले जानकारी दिए । उनका अनुसार फोर्ट, सिद्धार्थ, प्राइम, एरिष्टो, टाइमलगायत कम्पनीहरुले निःशुल्क औषधी उपलब्ध गराएका थिए ।