बिर्तामोड । स्थानीय तह निर्वाचन २०७९ अन्तर्गत निर्वाचित बिर्तामोड नगरपालिकाका जनप्रतिनिधीले सोमबार सपथ लिएका छन् । नगरपालिका परिसरमा आयोजित एक कार्यक्रमका बिच बिर्तामोडका ५१ जना जनप्रतिनिधीहरुले सपथ ग्रहण गरेका हुन ।

सोमबार जिल्ला अदालत झापामा सपथ लिएपछि नगरप्रमुख पवित्रा महतरा प्रसाईले पदभार ग्रहण गरेकी थिइन् । नवनिर्वाचित जनप्रतिनिधीहरुलाई नगरप्रमुख प्रसाईले सपथ ग्रहण गराएकी थिइन् । सबै वडाका वडाध्यक्षहरुलाई आजै पद बहाली समेत गराइने बताइएको छ ।

सपथ ग्रहण कार्यक्रममा बोल्दै नगरप्रमुख प्रसाईले अब जनप्रतिनिधीहरु कुनै दलको नभएर आम नगरबासी जनताको अभिभावकको रुपमा आउनुपर्ने बताइन् । विकासका योजनाहरु बनाउँदा कुनै दलको नाममा बखेडा झिक्न नहुने बताउँदै प्रसाईले प्रतिनिधीहरु जनसुकै दलबाट आएपनि समाजको समृद्धिको लागि आएको बताइन् ।

प्रसाईले बिर्तामोडको विकासका लागि सबै पक्षसँग सल्लाह गरेर अगाडी बढ्ने बताइन् । जनतालाई सुशासन कायम राख्दै मुस्कानसहितको सेवा प्रवाह गर्ने प्रतिबद्धता जनाइन् । सिमित स्रोत साधनको प्रयोग गरेर असिमिति आवश्यकताहरु पुरा गर्नुपर्ने भएकाले सबैको सल्लाह र सुझावबाट अगाडी बढ्नुपर्नेमा जोड दिइन् ।

कार्यक्रममा नगर उपप्रमुख नगेन्द्रप्रसाद संग्रौला लगायत बिर्तामोड–१ का वडाध्यक्ष अग्नी पाण्डे, महिला सदस्य यमुनादेवि आचार्य, दलित महिला सदस्य कमला महरा दर्जी, वडा सदस्यहरु टेकबहादुर अधिकारी र योगचन्द्र आङबुहाङले सपथ लिएका थिए ।

त्यस्तै २ नम्बर वडाका वडाध्यक्ष किशोरकुमार पौडेल, महिला सदस्य तिला गौतम, दलित महिला सदस्य सर्मिला तिखत्री, वडा सदस्यहरु ओमनाथ गौतम र चेतन विमलीले पनि सपथ लिएका थिए ।

सपथ ग्रहण गर्ने अरु जनप्रतिनिधीहरुमा वडा नम्बर तीनका वडाध्यक्ष मदन बुढाथोकी, महिला सदस्य धनसरी राजवंशी, दलित महिला सदस्य लक्ष्मी रोक्का सार्की, वडा सदस्यहरु भागीमान लिम्बु र हरिप्रसाद बास्कोटा रहेका छन् ।

वडा नम्बर ४ का वडाध्यक्ष राहुल शर्मा, महिला सदस्य रमादेवि राजवंशी, दलित महिला सदस्य निर्मलादेवि सुनार, वडा सदस्यहरु उमेश राउत र केशव श्रेष्ठलेपनि सपथ ग्रहण गरे ।

वडा नम्बर ५ का वडाध्यक्ष रोहित प्रसाईँ, महिला सदस्य शान्ता रोका क्षेत्री, दलित महिला सदस्य मालत विश्वकर्मा, वडा सदस्यहरु ओमभक्त सेडाईँ र दुर्गाप्रसाद शिवाकोटीले पनि सपथ ग्रहण गरेका छन् ।

सपथ लिने वडा नम्बर ६ का वडाध्यक्ष सूर्यप्रसाद कन्दङवा, महिला सदस्य गीता शर्मा (रेग्मी), दलित महिला सदस्य शेभा विश्वकर्मा, वडा सदस्यहरु खेमनाथ अधिकारी र जिवन बास्कोटा रहेका छन् ।

वडा नम्बर ७ का वडाध्यक्ष कृष्णप्रसाद खरेल, महिला सदस्य मनकुमारी लिम्बु, दलित महिला सदस्य हिमलता विश्वकर्मा, वडा सदस्यहरु खडानन्द निरौला र लक्षिमा खतिवडालेपनि सपथ लिएका छन् ।

वडा नम्बर ८ का वडाध्यक्ष अजय कार्की, महिला सदस्य इन्दिरा पाण्डे, दलित महिला सदस्य लक्ष्मी नेपाली, वडा सदस्यहरु अग्नीप्रसाद सिटौला र सोयालाल राजवंशीलेपनि कार्यक्रममा सपथ लिएका छन् ।

वडा नम्बर ९ बाट सथप लिनेमा वडाध्यक्ष हरिप्रसाद चौलागाई, महिला सदस्य सल्पना राजवंशी, दलित महिला सदस्य संगिता सिवा, वडा सदस्यहरु केशव बुढाथोकी र चन्द्रप्रसाद दंगाल रहेका छन् ।

त्यस्तै वडा नम्बर १० बाट वडाध्यक्षमा दुर्योधन गुरुङ, महिला सदस्य धनमाया श्रेष्ठ, दलित महिला सदस्य दिपिका सिवा, वडा सदस्यहरु पञ्चधन राई र पृथीबहादुर बस्नेतले सपथ लिएका हुन् ।