बिर्तामोड । बिर्तामोड नगरपालिकामा ६ हजार बढी मतले निर्वाचन जित्ने गठबन्धनका नगर प्रमुख तथा उपप्रमुखका उम्मेदवारले दावी गरेका छन् ।

गत निर्वाचनमा प्राप्त मतपरिणामलाई आधार मानेर अहिलेको माहौलले गठबन्धनको जित सुनिश्चित भएको उनीहरुले दावी गरेका हुन् । चुनावी घरदैलोका क्रममा बिर्तामोड–३ स्थित बुद्धपार्क (गोसलाइन)मा आयोजित कोणसभालाई सम्बोधन गर्दै गठबन्धनका तर्फबाट उम्मेदवारी दिएका मेयरका प्रत्यासी नेपाली कांग्रेसका भोजराज सिटौला र उपमेयरका प्रत्यासी नेकपा माओवादी केन्द्रका सीपी कडरियाले जित सुनिश्चित देखेर विपक्षी नेकपा एमालेले विभिन्न भ्रम फैलाउँदै गठबन्धनलाई भाँड्न खोजेको आरोप लगाएका छन् ।

कार्यक्रममा बोल्दै मेयरका उम्मेदवार सिटौलाले आफूहरुको जित सुनिश्चित देखेर एमालेले विभिन्न प्रपोगान्डा मच्चाउन खोजेको आरोप लगाए । उनले त्यसप्रति सचेत रहँदै खबरदारी गर्न आममतदाता र कार्यकर्ताहरुलाई आग्रह गरे । गत निर्वाचनमा एमालेले मेयरमा ९ हजार १ सय १० मत प्राप्त गर्दा कांग्रेसले ८ हजार २ सय १७ मत पाएको थियो भने माओवादीले ३ हजार ७ सय ९७ मत प्राप्त गरेको थियो ।

त्यस्तै उपमेयरमा एमालेले १० हजार ४ सय ३७ मत ल्याउँदा कांग्रेसले ९ हजार ११ मत प्राप्त गरेको थियो । त्यस्तै माओवादीले ३ हजार ८ सय ७६ मत पाएको थियो । निर्वाचन जित्न यो गठबन्धन काफी भएको उपमेयरका उम्मेदवार कडरियाले दाबी गरे । ‘हामी ५–६ हजार मतान्तरले अगाडि छौं’ उनले भने,‘यतिले मात्र पुग्दैन हाम्रो शक्तिलाई अझै संगठित र सुरक्षित गर्नुपर्छ । उनले गठबन्धनका सबै उम्मेदवारहरु योग्य भएकाले नगरको विकासमा आफूहरुको टीमले अहिलेको भन्दा बीस गुणा बढी काम गरेर देखाउने दावी गरे ।

वेदप्रकाश न्यौपानेको सभापतित्वमा भएको कार्यक्रममा निर्वाचन परिचालन मूल समितिका सहसंयोजक युवराज दाहाल, बिर्तामोड–३ का वडाध्यक्षका उम्मेदवार प्रेमप्रसाद उप्रेती, वडा सदस्यकी उम्मेदवार जानुका थापा मगरलगायतले बोलेका थिए ।

कार्यक्रममा निर्वाचन परिचालन मूल समितिका संयोजक लक्ष्मी आचार्य, कांग्रेसका प्रदेश सदस्य मीरा खड्का, माओवादी केन्द्रका सहइन्चार्ज ज्योतिसिंह दर्लामीलगायतको उपस्थिति रहेको थियो । बिर्तामोड–३ मा गठबन्धनका तर्फबाट वडाध्यक्षमा प्रेमप्रसाद उप्रेती, सदस्यमा पूर्णप्रसाद राजवंशी, संजय शर्मा, जानुका थापा मगर र विष्णुमाया विकले उम्मेदवारी दिएका छन् । आइतबार नै बिर्तामोड–३ को सैनिकमोडमा पनि गठबन्धनले कोणसभा गरेको थियो ।