बिर्तामोड । स्थानीय तह निर्वाचनका लागि उम्मेदवारहरुलाई मतदाताको घरदैलोमा पुग्न भ्याई नभ्याई छ । राष्ट्रिय प्रजातन्त्र पार्टी बिर्तामोड–५ मतदातालाई प्रतिबद्धता सुनाउँदै मत माग्न व्यस्त छ ।

राप्रपाको तर्फबाट वडा नम्बर ५ का वडाध्यक्ष प्रकाश घिमिरे आइतबार जात्रुबारी चोकमा घरदैलोमा व्यस्त भेटिए । राप्रपाले अघि सारेको प्रतिबद्धता पत्र सुनाउन उनको टिमलाई भ्याइ नभ्याई थियो । राप्रपा अध्यक्ष राजेन्द्र लिङ्देनको भ्रष्टाचार गर्नु भनेको आमाको रगत खानु हो भन्ने भनाईलाई राप्रपाले चुनावी प्रचारप्रसारमा मुल नारा बनाएको छ । भ्रष्टाचारमुक्त वडाको कल्पना गरेको भन्दै उम्मेदवारहरुले मतदाताहरुलाई मत मागिरहेका थिए ।

बिर्तामोडको मुख्य बजार क्षेत्रको आधा भाग ओगटेको ५ नम्बर वडालाई समुन्नत वडा बनाउन राप्रपाले जित्नुपर्ने उनीहरुले बताई रहेका थिए ।

बिर्तामोड ५ मा राप्रपाका तर्फबाट वडाध्यक्ष घिमिरेसहित वडा सदस्य सेरबहादुर मादेन र लक्ष्मीप्रसाद तिम्सिना, महिला सदस्य दुर्गा खतिवडा र दलित महिला सदस्य सुमित्रा गजमेर उम्मेदवार रहेका छन् ।