बिर्तामोड । झापाको कचनकवल गाउँपालिकाको अध्यक्ष पदमा नेपाली कांग्रेसको तर्फबाट उम्मेदवारी दिएका कालेन्द्रप्रसाद सिं राजवंशी विरुद्ध उजुरी दर्ता भएको छ । राजवंशी घेराबारीस्थित बुद्ध निमाविको प्रधानाध्यापक हुँदा गरेको बेरुजु फस्र्यौट नगरेको भन्दै निर्वाचन अधिकृतको कार्यालयमा उनी विरुद्ध उजुरी परेको हो ।

राष्ट्रिय प्रजातन्त्र पार्टीको तर्फबाट अध्यक्ष पदको उम्मेदवार अञ्जरा आलमले राजवशी विरुद्ध उजुरी दर्ता गराएको निर्वाचन अधिकृतको कार्यालय कचनकवलले जनाएको छ । राजवंशीले आर्थिक बर्ष २०७२/०७३ मा ३ लाख, आर्थिक बर्ष २०७३/०७४ मा ३ लाख र आर्थिक बर्ष २०७४/०७५ मा १० लाख बेरुजु रहेको र फस्र्यौट नगरेको भन्दै आलमले प्रमाणसहित उजुरी दिएका हुन । राजवंशी प्रधानाध्यापक रहेको उक्त विद्यालयमा वृहत मर्मत र भवन निर्माणमा छुट्टिएको बजेट फर्स्यौट गर्न बाँकी रहेको बताइएको छ ।

निर्वाचन तालिका अनुसार आज उम्मेदवार विरुद्ध उजुरी गर्ने समय दिइएको थियो । निर्वाचन अधिकृतको कार्यालयले राजवंशीलाई आफ्नो सफाई तथा सबुत प्रमाण सहित भोली १४ गते उपस्थित हुन सूचना जारी गरेको छ ।

यता राजवंशीले भने आफूले अवकाश हुँदाका प्रधानाध्यापक मालचन राजवंशीलाई फरफारकको सम्पूर्ण कागजात बरबुझारत गरेको बताए । सबै हरहिसाब बुझाएर आफुले अवकासहुँदाका बखत पाउनुपर्ने सुविधा लिएको उनको भनाई छ । बेरुजु भएको भए अडिट रिपोर्टमा आउनुपर्ने भन्दै विपक्षीले चुनावी फण्डा मच्चाउन मात्र आरोप लगाएको बताए ।