मेचीनगर । भारतीय जेलमा बिना सुनुवाइ ४० वर्ष राखिएका दुर्गाप्रसाद तिम्सिनालाई क्षतिपूर्ति हस्तान्तरण गरिएको छ । आइतबार झापाको मेचीनगरस्थित मेची भन्सार परिसरमा आयोजित एक कार्यक्रमका बिच तिम्सिनालाई रकम हस्तान्तरण गरिएको हो ।

कोलकातास्थित नेपाली महावाणिज्यदूत ईश्वरराज पौडेलले तिम्सिनालाई क्षतिपूर्ति रकम बराबरको चेक हस्तान्तरण गरे । तिम्सिनाले उच्च अदालत, कोलकताको आदेश अनुसार नेपाली ८ लाख रुपैयाँ क्षतिपूर्ति पाएका हुन् । भारतको उच्च अदालत कोलकाताले २१ मंसिरमा तिम्सिनालाई भारु ५ लाख रुपैयाँ क्षतिपूर्ति दिलाउन पश्चिम बंगाल सरकारलाई आदेश दिएको थियो ।

मुख्य न्यायाधीश प्रकाश श्रीवास्तव र न्यायाधीश राजर्षि भारद्वाजको संयुक्त इजलासले भारतस्थित नेपाली महावाणिज्य दूतावासमार्फत् ६ साताभित्र दुर्गाप्रसादको बैंक खातामा क्षतिपूर्ति रकम पठाउन भनेको थियो । तर रकम प्राप्त हुन अदालतले तोकेभन्दा बढी समय लागेको पौडेलले बताए ।