झापा । कोशी प्रदेशका पूर्वमुख्यमन्त्री तथा कांग्रेस सांसद केदार कार्कीमाथि कर्मचारीलाई धम्क्याएको आरोप लागेको छ । कोशी प्रदेशको सामाजिक विकास मन्त्रालयका सचिव लक्ष्मीप्रसाद भट्टराईले आफूलाई पूर्वमुख्यमन्त्री कार्कीले फोनमार्फत कुटपिट गरेर शौचालयमा थुन्ने धम्की दिएको आरोप लगाएका छन् ।

सोमबार मोरङका प्रमुख जिल्ला अधिकारी प्रेमप्रसाद भट्टरलाई एक निवेदन दिंदै उनले जीउ धनको रक्षा र शान्ति सुरक्षाको माग गरेका छन् भने दोषीमाथि कारवाही गर्न आग्रह गरेका छन् ।

सोमबार अपरान्ह ४:५३ बजे विरोट गोल्ड कपको विषयलाई लिएर तथानाम गालीगलौज गरेको उनको निवेदनमा उल्लेख छ । ‘मात्रिका यादवले सचिवलाई कुटेर शौचालयमा थुनेको याद होला, म पनि तलाईं मन्त्रालयमा आएर कुट्छु, शौचालयमा थुन्छु’ भन्दै गालीगलौज गरेको सचिव भट्टराईको दाबी छ ।

उनले कल डिटेल्सका आधारमा अनुसन्धान गरी कार्कीलाई कारवाही गर्न माग गरेका छन् । भट्टराईले सो निवेदनको बोधार्थ मुख्यमन्त्री तथा मन्त्रिपरिषद्को कार्यालय कोशीमा पनि दिएका छन् ।