बिर्तामोड । अर्जुनधारा नगरपालिकाका नगर प्रमुख बलदेवसिंह गोम्देन तामाङसहित तीन जनालाई बिर्तामोडमा सम्मान गरिएको छ । नगर प्रमुख तामाङसहित नाट्यकर्मी तथा झापा नाट्य प्रतिष्ठानका अध्यक्ष माधव कल्पित र साहित्यीक श्रष्टा लवकुश गौतमलाई सम्मान गरिएको हो ।

विश्व संगीत दिवसको अवसरमा सप्तक संगीत विद्यालयले उनीहरुलाई सम्मान गरेको हो । विद्यालय परिसरमा आयोजित एक कार्यक्रमका बिच उनीहरुलाई विद्यालय अभिभावक संघका अध्यक्ष सत्यनारायण तायल, विद्यालयका अध्यक्ष सरोज वत्स र संरक्षक डा. कुमार सुवेदीले सम्मान पत्र समर्पण गरेका थिए ।

विश्व संगीत दिवसको अवसरमा विद्यालयले विभिन्न सांगीतिक कार्यक्रमसमेत आयोजना गरेको थियो । विद्यालयमा अध्ययनरत विद्यार्थीहरुले गीत तथा नृत्य प्रस्तुत गरेका थिए ।

कार्यक्रममा विर्तामोड–५ का निवर्तमान अध्यक्ष राजेन्द्र लिङ्देन, सांगीतिक तथा साहित्यिक व्यक्तित्व देविभक्त श्रेष्ठलगायतले शुभकामना मन्तव्य राखेका थिए ।

विद्यालयका अध्यक्ष वत्सले मुनाफा नबाँड्ने संस्थाको रुपमा स्थापित विद्यालयलाई भविष्यमा गुठीको रुपमा विकास गरिने बताए । सप्तक संगीत विद्यालय मोफसलको पहिलो संगीत विद्यालय भएको बताउँदै भविष्यमा स्नातक तथा स्नातकोत्तर तहसम्मको पढाई गरिने लक्ष्य लिएको उनले जानकारी दिए ।

भारतीय विश्व विद्यालयबाट संगीतमा स्नातकोत्तर वत्स र संगीतमा नै विश्व विद्यालयबाट डिग्री हासिल संजिवनी पौड्यालले सप्तक संगीत विद्यालय सञ्चालन गरिरहेका छन् । प्रख्यात गायिका मेनुका पौडेल, रचना रिमाल, कृपा पौडेल, रोशा फुयाललगायत सप्तक संगीत विद्यालयका उत्पादन हुन् ।

कार्यक्रममा सहभागीहरुलाई विद्यालयका संरक्षक डा. सुवेदीले स्वागत गरेका थिए ।