बिर्तामोड । काँकरभिट्टा खानेपानी तथा सरसफाई उपभोक्ता समिति अध्यक्षमा रोहित बुढाथोकी विजयी भएका छन् । बुढाथोकी १९९१ मतसहित विजयी बनेका हुन् ।

उनका निकटतम प्रतिद्वन्दी सन्तोष आचार्यले १८०८ र सुदर्शन खड्काले ३४६ मत प्राप्त गरेका थिए ।

त्यस्तै उपाध्यक्षमा गोविन्द गिरी २२६६ मतसहित विजयी बन्दा अर्का उम्मेदवार राजु दाहालले १२१९ र कृष्ण सुवेदीले ६३० मत प्राप्त गरेका थिए ।

सचिवमा विशाल तामाङ विजयी बनेका छन् । उनले १७४५ मत प्राप्त गरे भने उनका प्रतिद्वन्दी दिलिप सुब्बाले १६६३ र नरेन्द्र शिवाकोटीले ५९८ मत प्राप्त गरेका थिए ।

कोषाध्यक्ष पदमा विमला तामाङ विजयी बनेकी छन् । उनले २०६५ मत प्राप्त गरिन् भने अन्य उम्मेदवारहरु विमला देवकोटाले १४६३ र सुधादेवि खड्काले ३९८ मत प्राप्त गरेको निर्वाचन समितिले जनाएको छ ।

त्यस्तै महिला सदस्यमा इन्दिरा बुढाथोकी र मीरा कार्की विजयी बनेका छन् । सदस्यहरुमा इन्द्रबहादुर प्रधान, डिल्लीकुमार काफ्ले र केदारजंग भट्टराई विजयी भएका छन् । त्यस्तै लेखा समिति संयोजकमा सोमराज ढकाल र सदस्यहरुमा बालकुमार भुजेल खवास र जोश्ना राजवंशी विजयी भएका छन् ।

समितिको १२ पदका लागि ३४ जनाले उम्मेदवारी दर्ता गराएका थिए । खड्काले रास्वपाको एकल प्यानलबाट, आचार्यले एमाले नेतृत्वको प्यानलबाट र बुढाथोकीले कांग्रेस नेतृत्वको प्यानलबाट उम्मेद्वारी दर्ता गराएका थिए ।

नेकपा एमाले नेतृत्वको प्यानलमा जनता समाजवादी पार्टी र नेपाली कांग्रेस नेतृत्वको प्यानलमा नेकपा माओवादी केन्द्र, नेकपा एकीकृत समाजवादी र राष्ट्रिय प्रजातन्त्र पार्टीको समिकरण रहेको थियो ।

कुल ४१९८ मत रहेकोमा ३१० मत बदर भएको निर्वाचन समितिले जनाएको छ ।