बिर्तामोड, जेठ २५ । बाह्रदशी गाउँपालिकामा रहेका सामुदायिक विद्यालयमा अध्ययनरत १७ जना विद्यार्थीलाई बाह्रदशी जेसीजले अभिभावकत्व ग्रहण गरेको छ ।

जेसीजको दिगो विकास कार्यक्रम अन्तरगत विद्यार्थीको सम्पूणर् खर्च ब्यहोर्ने गरी जेसीजले यस वर्ष १७ जना विद्यार्थीको अभिभावकत्व ग्रहण गरेको हो । यो संगै विद्यार्थीलाई विद्यालय पोशाकसहित आवश्यक पर्ने स्टेशनरी, जुत्तामोजा र स्कुल व्याग समेत प्रदान गरेको छ ।

बाह्रदशी गाउँपालिकाका अध्यक्ष देविन्द्रप्रसाद चम्लागाई, उपाध्यक्ष शान्तादेवी शिवाकोटी खरेल, प्रमुख प्रशासकीय अधिकृत जनार्दन निरौला लगायतको सहभागीतामा गाउँपालिकामा आयोजित कार्यक्रमकाबीच जेसीजले १६ वटा सामुदायिक विद्यालयमा अध्ययनरत १७ जना विद्यार्थीको अभिभावकत्व ग्रहण गरेको हो ।

बाह्रदशी जेसीजका अध्यक्ष खगेन्द्र सुवेदीको अध्यक्षता र गाउँपालिका अध्यक्ष चम्लगाईको प्रमुख आतिथ्यमा आयोजित कार्यक्रमकाबीच बिद्यार्थीलाई नगद सहित स्टेसनरीसामग्री, स्कूल ब्याग प्रदान गर्दै अभिभावकत्व ग्रहण गरिएको घोषणा गरिएको थियो ।

गाउँपालिका भित्र रहेका रहेक एक /एक वटा सामुदायिक विद्यालयबाट एक/ एक जना विद्यार्थीलाई छनोट गर्दै बाह्रदशी जेसीजले अभिभावकत्व ग्रहण गरेको हो ।

विपन्न समुदायका बालबालिकालाई शिक्षाको पहुँचमा ल्याउन र उनीहरुलाई गुणस्तरीय शिक्षा प्रदान गर्न बाह्रदशी जेसीजले गत बर्षबाट यो कार्यक्रम सञ्चालन गरेको छ । सोही कार्यक्रमलाई यस बर्षपनि निरन्तरता दिइएको बाह्रदशी जेसीजका अध्यक्ष सुवेदीले बताए ।

जेसीजले अभिभावकत्व ग्रहण गरेका विद्यार्थीको सबै खर्च अब जेसीज पदाधिकारीले ब्यहोर्ने छन् । जेसीजमा आवद्ध एक/ एक जना ब्यक्तिले एक/एक जना विद्यार्थीको सबै खर्च ब्यहोर्ने बताइएको छ ।

बाह्रदशी जेसीजका उपाध्यक्ष राजु अधिकारीले आस्था बाचन गरेको कार्यक्रममा प्रमुख अतिथि गाउँपालिका अध्यक्ष चम्लगाई, उपाध्यक्ष खरेल, प्रमुख प्रशासकीय अधिकृत निरौला सहित शिक्षा शाखाका निमित्त प्रमुख योगराज पौडेल, पशुपति माध्यमिक विद्यालयका प्रधानाध्यापक थीर कुमार दाहाल, घोडामारा आधारभूत विद्यालयका प्रधानाध्यापक  कमल चम्लगाईल गायतले शुभकामना मन्तब्य राखेका थिए ।

बाह्रदशी जेसीजका पूर्व अध्यक्ष लक्ष्मी प्रसाद उप्रेतीले उद्देश्यमाथि प्रकाश पारेको कार्यक्रममा बाह्रदशी जेसीजका कार्यकारिणी उपाध्यक्ष नवीन कुमार त्रितालले स्वागत गरेका थिए भने बाह्रदशी जेसीजकी कार्यकारिणी उपाध्यक्ष सदिक्षा खड्काको संयोजकत्वमा कार्यक्रम गरिएको थियो । उनले कार्यक्रममा सहभागीलाई धन्यवाद ज्ञापन गरेकी थिइन् । कार्यक्रमको सञ्चालन महासचिव सञ्जय साहले गरेका थिए ।

गाउँपालिका भित्र रहेका सामुदायिक विद्यालयमा अध्ययनरत गरिब तथा जेहेन्दार बालबालिकालाई अभिभावकत्व ग्रहण गर्दै कक्षा १२ सम्म अध्ययन गर्दा लाग्ने  सम्पूणर् खर्च ब्यहोर्ने गरी बाह्रदशी जेसीजले दीगो विकास कार्यक्रम अन्तरगत गत वर्षबाट यो कार्यक्रम सञ्चालन गरेको हो ।