बिर्तामोड । बिर्तामोड वडा नम्बर–४ शिवनगर टोलकी ६६ वर्षीया विष्णुकुमारी बिष्टको हत्या आरोपमा प्रहरीले एक दम्पतीसहित पाँच जनालाई पक्राउ गरेको छ । पक्राउ परेका अभियुक्तलाई आज दिउँसो १ बजे सार्वजनिक गर्ने प्रहरीको तयारी छ ।

प्रहरीले बिर्तामोड–४ शिवनगर टोलका २१ वर्षीय गंगा राजवंशी र उनको श्रीमतीसहित पाँच जनालाई पक्राउ गरेको छ यद्यपी उनीहरुको नाम भने प्रहरीले सार्वजनिक गरेको छैन ।

प्रहरी स्रोतका अनुसार राजवंशीको घरबाट गाडेको अवस्थामा चोरीका सामाग्रीसमेत बरामद भएको छ ।

प्रहरीको जिल्ला, प्रदेश र केन्द्रीय अनुसन्धान ब्युरोको टीमले विभिन्न व्यक्तिहरुको बयान लिनुका साथै प्राविधिक जाँच पश्चात अभियुक्तसम्म पुग्न सफल भएको प्रहरी स्रोतले जनाएको छ ।

वैशाख २६ गते राति ११:४५ बजे घरमा चोर आएको भन्दै मृतक बिष्टले काठमाण्डौमा भएका छोरा प्रकाशलाई फोन गरेकी थिइन् । घरमा चोर आएको भन्दै आमाले फोन गरेपछि छोरा प्रकाशले श्रीप्रसाद सिटौलालाई गएर आफ्नो घर हेरिदिन भन्दै फोन गरेका थिए । छिमेकीहरू भेला भएर घर वरपर लाइट लगाएर हेरेको र कोही पनि मानिस फेला नपरेपछि उनीहरू आ–आफ्नो घर फर्किएका थिए ।

बिहान छिमेकीहरू आएर हेर्दा कम्पाउण्ड गेट बन्द भएको तर बिष्टको शव घरभित्र हत्या भएको अवस्थामा फेला परेको थियो ।

सम्बन्धित अन्य समाचार

बिर्तामोडमा एक वृद्धाको शव फेला, हत्या भएको आशंका

बिर्तामोड मृत्यु प्रकरण : खन्तीले हानेर वृद्धाको हत्या