झापा । काठमाण्डौको गोठाटारस्थित जम्बुडाँडामा गार्मेन्ट व्यवसायी लाल मोहम्मद अन्सारीको डेढ वर्ष अघि गोली हानी हत्या गर्ने समूहका भारतीय नागरिक बब्लु पासवानलाई प्रहरीले गोली प्रहार गरी आइतबार नियन्त्रणमा लिएको छ ।

पर्साको वीरगञ्जमा प्रहरी चेकको क्रममा उनी पक्राउ परेको एसपी कुमुध ढुंगेलले जानकारी दिए । तयारी पोसाक र झोला बनाउने फ्याक्ट्रीका सञ्चालक सर्लाहीका लाल मोहम्मद अन्सारीलाई २०७९ असोज २ मा पासवानको समूहले उनकै फ्याक्ट्री अगाडी टाउको, छाती र पेटमा गोली हानी हत्या गरेको थियो । अन्सारी फ्याक्ट्रीका लागि सामान खरिद गरेर फर्किएपछि उनलाई कुरेर बसेका उनीहरुले गोली हानेर फरार भएका थिए । बाबुलाई गोली हानेको देखेपछि माथिल्लो तलाबाट हामफालेर अन्सारीको छोरीले सुटरलाई पछ्याएपनि उनीहरुलाई भेट्न सकेकी थिइनन् ।

हत्याका अभियुक्तलाई प्रहरीले खोजी गरिरहेको थियो । पासवान भारत रक्सौलका बासिन्दा हुन् । उनी बिगतमा लागूपदार्थ कारोबार मुद्दामा नेपालमा ५ वर्ष कैद बसेर छुटेका थिए ।

ढुंगेल पर्सा प्रहरी प्रमुख भएसँगै प्रहरी चेकजाँचलाई कडा बनाएका छन् । उनले केहि दिन अघिमात्र अनुमति नलिई विदाको दिन चलाएको सरकारी सवारी साधन नियन्त्रणमा लिएर कारबाही गरेका थिए ।