बिर्तामोड । अनुहारमा मासु पलाएका झापाका पत्रकार सञ्जय भट्टराई आर्थिक अभावमा उपचार गराउनबाट बञ्चित भएका छन् । इलामको सूर्योदय–७ गोगने घर भएका २३ वर्षीय भट्टराई आर्थिक अभावमा कुरुप अनुहार लिएर हिड्न बाध्य भएका हुन् ।

विर्तामोडको मनकामना कलेजमा स्नातक तह प्रथम वर्षमा पत्रकारिता अध्ययन गरिरहेका भट्टराई अर्जुनधाराको मेरो रेडियोमा समाचार बाचक र कार्यक्रम प्रस्तोताको रुपमा कार्यरत छन् । उनको दाहिने गाला, कान र चिउडोमा मासुको ठूलो लुर्को पलाएको छ ।

डेरामा बसेर अध्ययन र पत्रकारितालाई सँगसँगै अघि बढाइरहेका उनलाई मासुले अनुहार ढाकेका कारण हिँडडुल गर्न र खान समस्या भइरहेको छ भने कान र दाहिने आँखामा पनि समस्या भएको बताउँछन ।

मासु पलाउने समस्या जन्मजात भएको जनाउँदै पत्रकार भट्टराईले धरानको वीपी कोइराला स्वाथ्य विज्ञान प्रतिष्ठान र विर्तामोडको बीएण्डसी हस्पिटलमा जचाउँदा चिकित्सकहरुले शल्यक्रिया गर्नुपर्ने सुझाव दिएको बताए ।

शल्यक्रिया गर्नका लागि आर्थिक अभाव भएको उनले बताए । अरु मान्छे जस्तै हुन इच्छा भएको र रुपकै कारण धेरै कुरा गुमाएको बताउने भट्टराईले उपचारका लागि पहल गरिदिन अपिल गरेका छन् । उनले अनुहारकै कारण सहज रुपमा अन्य जागिरसमेत पाउन गाह्रो भएको पीडा सुनाए ।    

हाम्रो अभियान नेपालका संयोजक नरेश मोहोराले इजी केयर फाउण्डेसनमार्फत शुष्मा कोइराला मेमोरियल अस्पताल साँखु काठमाण्डौमा उनको उपचारका लागि पहल भइरहेको बताए ।

भविष्यमा असल पत्रकार बनेर समाजसेवा गर्ने सपना साँचेका उनको बुवाआमा सामान्य कृषक हुन् भने एउटा भाइ वैदेशिक रोजगारीमा छन् ।