बिर्तामोड । मंगलबार साँझ बिर्तामोड–३ स्थित बिर्ताबजारमा अटो दुर्घटना पश्चात फरार अटो चालक पक्राउ परेका छन् । प्रहरीले अटो चालक बिर्तामोड–९ का ४२ बर्षीय अरुण तामाङलाई पक्राउ गरेको हो ।

दुर्घटना लगत्तै फरार भएका तामाङलाई आधा घण्टापछि पक्राउ गरिएको इलाका प्रहरी कार्यालय अनारमनीले जनाएको छ । उनको ढाडमा सामान्य चोट लागेको र उपचार पश्चात इप्रका अनारमनीको हिरासतमा राखिएको इप्रका अनारमनीका प्रमुख प्रहरी नायव उपरीक्षक प्रकाश विष्टले जानकारी दिए । चालक तामाङको साथबाट तत्काल सवारी चालक अनुमती पत्र (लाइसेन्स) प्राप्त नभएको प्रहरीले जनाएको छ । 

मंगलबार साँझ ७ः१५ बजे बिर्तामोडबाट गरामनी जाँदै गरेको प्र १–०१–००२ ह ६२१ नम्बरको अटो अनियन्त्रित भई पल्टिँदा ताप्लेजुङ जिल्ला साबिकको डुम्रिसे–२ बस्ने ३६ बर्षीय भीमबहादुर तामाङको मृत्यु भएको थियो । अर्की यात्रु ताप्लेजुङ  जिल्ला पाथीभरा याङवरक–२ बस्ने ३१ बर्षीय सामना लिम्बू घाइते भएकी थिइन् । उनको बीएण्डसी अस्पताल बिर्तामोडमा आइसीयुमा उपचार भइरहेको प्रहरीले जनाएको छ ।