बिर्तामोड । रुसी सेनामा भर्ती भएका थप सात जना नेपालीको मृत्यु भएको छ । अवैधानिक माध्यमबाट रुसी सेनामा भर्ना भएका थप सात जना नेपाली नागरिकको मृत्यु भएको परराष्ट्र मन्त्रालयले जनाएको हो ।

परराष्ट्र मन्त्रालयले आज एक प्रेस विज्ञप्ति जारी गरी झापाका गंगाराम अधिकारी, धादिङका पूर्णबहादुर गुरुङ, जाजरकोटका नविन शाही, उदयपुरका पदमबहादुर घिमिरे, बाग्लुङका जितबहादुर विक, बाँकेका सञ्जय केसी र रसुवाका सुन्दर मोक्तानको मृत्यु भएको जनाएको छ । मन्त्रालयले विज्ञप्तिमार्फत दिवंगत भएकाहरुप्रति श्रद्धाञ्जली व्यक्त गर्दै शोकाकुल परिवारजनमा गहिरो समवेदना व्यक्त गरेको छ ।

रुसी सेनामा भर्ना भएका नेपाली नागरिकलाई फिर्ता पठाउन, मृत्यु भएकालाई रुसी सरकारबाट क्षतिपूर्ती उपलब्ध गराउन, घाइते भएकाहरुलाई उपचार गर्न र त्यहाँ कार्यरत नेपालीलाई नेपाल पठाउन मन्त्रालयले रुसी सरकारलाई पुनः आग्रहसमेत गरेको छ ।

मन्त्रालयले सम्झौता भएका केहि मित्रराष्ट्रहरुको राष्ट्रिय सेनामा बाहेक विदेशी सेनामा भर्तीहुन नेपाल सरकारले अनुमति नदिने नीति रहेको मन्त्रालयले जनाएको छ । सरकारी कामकाज, रुसी सरकारको छात्रवृत्ति र पेशाव्यवसायमा संलग्न भएका बाहेकलाई रुस यात्रा गर्नु परे नो अब्जेक्सन सर्टिफिकेट दिने व्यवस्था मिलाइएको पनि मन्त्रालयले जनाएको छ ।