बिर्तामोड । स्थानीय तहमा चरम भ्रष्टाचार हुने गरेको समाचार बाहिर आइरहेको बेला झापाको बाह्रदशी गाउँपालिकामा सरकारी स्रोतको दुरुपयोग भइरहेको पाइएको छ । सरकारी स्रोतसाधनको दुरुपयोग गर्दै बाह्रदशीका तीन जना कार्यपालिका सदस्यले गाउँपालिकाको मोटरसाइकल प्रयोग गर्ने गरेको पाइएको हो ।

गाउँपालिकाको नाममा रहेको मे १ ब ७५४, मे १ ब ७४९ र मे १ ब ७५१ नम्बरको बजाज कम्पनीको १५० सीसीको मोटरसाइकल कार्यपालिका सदस्यहरु क्रमश पञ्चानन्द राजवंशी, लक्ष्मी अधिकारी र मानबहादुर राजवंशीले  प्रयोग गर्दै आइएको पाइएको छ ।

गाउँपालिकाले सवारी साधन सञ्चालनसम्बन्धि कुनै निर्देशिका नबनाएको प्रमुख कार्यकारी अधिकृत जनार्दन निरौलाले जानकारी दिए । ‘पालिकामा सवारी साधन क–कसले प्रयोग गर्ने भन्ने निर्देशिका त छैन, तर उहाँहरुले पहिलेदेखि नै प्रयोग गर्दै आउनु भएको रहेछ,’ उनले भने । मापदण्ड बिना सुविधा दिँदा अन्य सदस्यहरुले पनि त्यो सुविधा माग गर्नुभयो भने दिन सकिन्छ ? भन्ने प्रश्नमा तत्काल दिन नसकिने अधिकृत निरौलाले बताए । कार्यपालिका सदस्यले सवारी साधनको सुविधा लिने कुनै ऐनमा व्यवस्था नभएको उनले बताए । 

उनीहरुले पालिकाबाट इन्धन सुविधासमेत लिने गरेको स्रोतले बतायो । पालिका अध्यक्ष र मोटरसाइकल प्रयोग गर्ने कार्यपालिका सदस्यहरुलाई यातायात खर्च बापतको रकम कट्टा गर्ने गरेको अधिकृत निरौलाले जानकारी दिए ।

पञ्चानन्द राजवंशी र मानबहादुर राजवंशी मनोनित कार्यपालिका सदस्य हुन् भने लक्ष्मी अधिकारी वडा नम्बर ३ का निर्वाचित सदस्य हुन् ।

७ वटा वडा रहेको बाह्रदशी गाउँपालिकामा २ जना मनोनितसहित १५ सदस्यीय कार्यपालिका रहेको छ ।