बिर्तामोड । मेचीनगर लेडी जेसीजले  मेचीनगरको शैक्षिक क्षेत्रको विकासमा महत्वपुर्ण योगदान पुर्याउने चार विद्यालयका महिला सञ्चालकहरुलाई सम्मान गरेको छ । जेसीजले मेचीनगर १० धुलाबारीस्थित इष्ट होराइजन अग्रेंजी माध्यमिक विद्यालयकी प्रशासन प्रमुख सावित्रा सापकोटा राई, मेचीनगर ६ मा रहेको पशुपति बोर्डिङ स्कूलकी सञ्चालक अनिता थापा, मेचीनगर ९ मा रहेको होलिबेल अंग्रेजी माध्यामिक विद्यालयकी सञ्चालक अमृता आङ्दाम्बे प्रधान र मेचीनगर ८ मा रहेको एभरेष्ट भ्यू अंग्रेजी माध्यमिक विद्यालयकी भाईस प्रिन्सिपल गोमा बुढाथोकीलाई सम्मान गरेको हो ।

जेसीजले ११४औं अन्तर्राष्ट्रिय दिवसको अवसर पारेर धुलाबारीमा आयोजित एक कार्यक्रमका बिच बुधबार उनीहरुलाई सम्मान गरेको हो ।

सम्मानित व्यक्तित्वहरुलाई कार्यक्रमकी प्रमुख अतिथी कोशी प्रदेश सभाकी सदस्य सविना बजगाईं र बिशेष अतिथि मेचीनगर नगरपालिकाकी उपप्रमुख मिना उप्रेतीले सम्मान पत्र प्रदान गरेका थिए ।

सम्मानित हुनेहरुले विद्यालय शुरु गर्दा भोग्नु परेका चुनौती, समस्या र बर्तमानमा सरकारले निजी विद्यालयहरुप्रति गरेको बेवास्ताका बारेमा आफ्ना अनुभव र धारणा राखेका थिए । उनीहरुले निजी विद्यालयले समाज र राष्ट्रमा पुर्याएको योगदानको कदर गरेकोमा लेडी जेसीजलाई धन्यवादसहित आभार व्यक्त गरे ।

सञ्जीवनी महिला विकास संस्थाकी अध्यक्ष रेणुका डाँगी, मेचीनगर लेडी जेसीजकी संस्थापक सल्लाहकार लक्ष्मी राई, सञ्चारकर्मी अम्बिका भण्डारीलगायतले शुभकामना मन्तव्य राखेका थिए ।

जेसीजकी अध्यक्ष पवित्रा प्रसाईं विमलीको अध्यक्षतामा भएको कार्यक्रममा सम्मानित व्यक्तित्वहरुको चर्चा सहसचिव सुष्मा राजवंशी, स्वागत कार्यकारिणी उपाध्यक्ष सकुन्तला खतिवडा, आस्था वाचन सर्मिला दाहाल र सञ्चालन रेजिना श्रेष्ठले गरेका थिए । मेचीनगर लेडी जेसीजले स्थापना कालदेखि नै विभिन्न रचनात्मक कार्यक्रम गर्दै आएको छ । कार्यक्रममा आजीवन सदस्य सीता गुरुङ, पूर्व अध्यक्षहरु शोभा श्रेष्ठ, उषा श्रेष्ठ लगायतको उपस्थिति रहेको थियो ।