बिर्तामोड । सुखानी सन्देशको विशेषाङ्कको विमोचन गरिएको छ । बिर्तामोडमा आयोजित एक कार्यक्रमका बीच उक्त विशेषाङ्क विमोचन गरिएको हो ।

प्रेस सेन्टर नेपाल झापाका अध्यक्ष राजु पाठकद्वारा प्रकाशित सुखानी सन्देशको उक्त विशेषाङ्क कोशी प्रदेशका सामाजिक विकास मन्त्री राजेन्द्र कार्कीले विमोचन गरेका हुन् । शहिद सप्ताहको अन्तिम दिनको अवसर पारेर विशेषांक विमोचन गरिएको हो ।

झापा विद्रोहसँग प्रत्यक्ष सम्बन्धित विभिन्न नेताहरूसहित शहिद परिवारका सदस्यहरू तथा उक्त घटनाका जानकारहरूको व्याख्या र विश्लेषणलाई पुस्तकमा समेटिएको छ ।

सुखानी सन्देशले पहिलोपटक शहिद भूमि सुखानीलाई अजर–अमर बनाउने ऐतिहासिक पात्रहरूको बलिदानी र कृति जीवन्त राख्न झापा विद्रोहमा केन्द्रित रहेर उक्त विशेषांक प्रकाशन गरेको प्रकाशक राजु पाठकले जानकारी दिए ।

पुस्तकको विषयमा बोल्दै अग्रज पत्रकार मोहनकाजी न्यौपानेले पुस्तक यथार्थ परक रहेको र एउटा ऐतिहासिक दस्तावेज भएको बताए । उनले सुखानीको विषयमा यस अघिका कृतिहरुमा केही आशंका र टिप्पणीहरू रहे पनि यस विशेषाङ्कमा यथार्थपरक लेखहरु समेटिएको बताए । झापा विद्रोहलाई नक्सलवादी आन्दोलनको प्रभाव रहेको भन्ने आलोचनालाई समेत यस विशेषांकले चिर्ने काम गरेको उनको भनाइ थियो ।

२०२८ सालमा युवा कम्युनिष्टहरूले झापाको ग्रामीण क्षेत्रबाट सुरु गरेको किसान आन्दोलन जुन झापा विद्रोहको रुपमा परिचित छ । तीनै युवा कम्युनिस्टहरुलाई तत्कालीन शासकले आन्दोलन दबाउने ध्येयले उक्त स्थानमा लगेर हत्या गरेको थियो ।

कार्यक्रमका बिच झापाका ४ दर्जन बढी शहिद  तथा बेपत्ता परिवारका सदस्यहरुलाई सम्मानसमेत गरिएको थियो ।

एक सय ४० पृष्ठ रहेको उक्त म्यागजिनको तीन सय रुपैँया मुल्य तोकिएको छ ।