बिर्तामोड । झापाको मेचीनगरमा सशस्त्र प्रहरी र स्थानीयबीच शुक्रबार साँझ झडप भएको छ । सशस्त्र प्रहरीले अवैध सामाग्री बरामद गरेको बिषयलाई लिएर झडप भएको हो ।

झडपमा दुवै तर्फ घाइते भएको सशस्त्र प्रहरी बल नेपाल नं. २ गण हेक्वा झापाका गणपति सशस्त्र प्रहरी उपरीक्षक कविन्द्र राईले जानकारी दिए । घाइते स्थानीयहरुको बिर्तामोडस्थित विएण्डसी अस्पताल र सशस्त्र प्रहरीको बिर्तासिटी अस्पतालमा उपचार भइरहेको छ । सुरुमा मनमोहन अस्पताल लगिएका घाइतेहरुको अहिले विएण्डसीमा उपचार भइरहेको छ ।

घाइते हुनेहरुमा १८ बर्षीय दिपक चौधरी,  २४ बर्षीया दिपा सरदार, ३५ बर्षीय हरी चौधरी, १७ बर्षीय बिशेषसिंह राजवंशी, १८ बर्षीय मिलन चापागाई, २२ बर्षीय आनन्द यादव रहेका छन् । उनीहरु सबै मेचीनगर ७ गैरीगाउँ निवासी हुन् । उनीहरुको अवस्था सामान्य रहेको प्रहरीले जनाएको छ । 

यता सशस्त्र प्रहरी बल नेपाल बिओपी सतिघट्टामा कार्यरत  गाडी चालक सशस्त्र प्रहरी सहायक हवल्दार  ३५ बर्षीय दुर्गाचन्द्र बस्नेत घाइते भएका छन् ।  उनको बाँया हातको औँलामा चोट लागेको छ ।

अवैध रुपमा भारतीय सामाग्री नेपाल भित्र्याउने क्रममा सशस्त्र प्रहरीले स्थानीयको सामान पक्राउ गरेपछि सशस्त्र प्रहरीमाथि स्थानीयले हमला गरेको र आत्मरक्षाको क्रममा घटना भएको सशस्त्र प्रहरी उपरीक्षक राईले बताए । ‘सशस्त्रले सामान बरामद गरेर गाडीमा ल्याउने क्रममा स्थानीयले आक्रमण गरे,’ उनले भने, ‘थोरै संख्यामा गाडीमा भएका सशस्त्रमाथि आक्रमण भयो, घाइते प्रहरीको आज १ बजे अपरेशन छ ।’ आक्रमणकारीले प्रहरीले बरामद गरेको सामान लिएर गएको उनले बताए । 

सशस्त्र प्रहरी निरीक्षक गणेश श्रेष्ठ नेतृत्वको टोलीले अवैध रुपमा ल्याउँदै गरेको १ लाख २० हजार मुल्यको कपडा बरामद गरेको र सो क्रममा सामान्य विवाद भएपछि बिओपी सतिघट्टाबाट सप्रनि हरिप्रसाद रिमालको मोबाइल टोली गएर सो बरामद सामान ल्याउने क्रममा करिब ५० जनाको संख्यामा रहेका स्थानीय र तस्करले घरेलु हातहतियारसहित प्रहरीमाथि सांघातिक आक्रमण गरेको प्रहरीले जनाएको छ । आक्रमणको क्रममा प्रहरीको गाडीमा समेत क्षति पुगेको बताइएको छ । 

खुला सीमानाको फाइदा उठाउँदै कारोबारीले भारतीय सामाग्री अवैध रुपमा नेपाल भित्र्याउने गरेका छन् । बेलाबेला उनीहरुको सशस्त्र प्रहरीसँग झडप हुने गरेको छ ।