सुरुङ्गा ।  झापाको कनकाई नगरपालिका ३ की उमादेवि गौतम घनिष्ठ सम्बन्ध बनाएका व्यक्तिले लाखौँ कुम्ल्याएर फिर्ता नगरेपछि मानसिक तनावमा छिन् । लामो समयदेखि पारिवारीक सम्बन्ध बनाएका कनकाई ४ का विकास बुढाथोकी र उनकै साला नाता पर्ने कनकाई ३ का दिनेश भनिने सिंहबहादुर बस्नेतले लाखौँ रकम लगेर फिर्ता नगरेपछि गौतमले आफु मानसिक र आर्थिक तनावमा परेको शुक्रबार घरमै पत्रकार सम्मेलन गरी बताएकीहुन् ।

आफु जमानी बसेर पैसा गराइदिएको व्यक्तिलाई गौतमले श्रीमानको नाममा भएको जग्गा दिएको तर आफ्नो पैसा बुढाथोकी र बस्नेतले फिर्ता नगरेपछि पारिवारिक अवस्था नै बिग्रन लागेको गौतमले गुनासो गरिन् ।  बुढाथोकी र बस्नेतले पटक पटक गरी साढे तेइस लाख रुपैँया विभिन्न बहानामा लगेर हालसम्म पनि फिर्ता नगरेको गौतमको गुनासो छ । आफुले १० लाख रुपैँया स्थानीय मंगलीमाया सार्कीसँग मागेर बस्नेतलाई दिएको तर पैसा लिएर बस्नेत सम्पर्कविहिन बनेपछि सार्कीलाई गौतमले श्रीमान सालिकराम कार्कीको नाममा साबिक सुरुङ्गा ५ मा रहको कि नं. २४९२ को १ कठ्ठा जग्गा दिएको बताइन् ।

विभिन्न दुख देखाएर बुढाथोकी र बस्नेतले पैसा मागेको तर फिर्ता गर्न आग्रह गर्दा बुढाथोकीले कानुनी जटिलता देखाएर धम्क्याउने गरेको गौतमको आरोप छ । शुरुका केहि समय बुढाथोकीले व्याजसमेत दिएको उनले बताइन् । बस्नेत  फरार भएपछि पैसा फिर्ता गर्नुपर्छ भनेर दबाब दिँदा बुढाथोकीले जग्गा पास गरिदिने र उनकी साली सपना कार्की बस्नेतले जग्गा बेचेर पैसा दिने बताएपनि पछिल्लो समय मानिसहरुको उक्साहटमा लागेर उनीहरुले अदालत जान भन्दै धम्क्याउने गरेको गौतमको भनाई छ । लिखत वडा कार्यालयमा प्रमाणित गराउनु पर्छ भन्ने ज्ञान नभएको र पारिवारिक सम्बन्ध भएका व्यक्तिले अहिले यस्तो गर्छ भन्ने अनुमान नलगाएका कारण अहिले आफुले दुख पाएको गौतमको गुनासो छ ।  

यस्तो छ घटनाक्रम  

व्यवसायको क्रममा बुढाथोकी र गौतम परिवार नजिक भए । विभिन्न पारिवारिक जमघटमा आउजाउ हुन थाल्यो । दुवै परिवार आपसमा नजिक बने । एक दिन बुढाथोकीले आफ्नो सालाको लागि भन्दै गौतमसँग ७ लाख रुपैँया मागे । गौतमले पनि पारिवारिक निकटताका आधारमा घर सल्लाह नै नगरी बुढाथोकीको पसलमै सात लाख रुपैँया पुर्याइन । २०७५ जेठ १८ गते अन्यत्रको साहु तिर्न भनी सात लाख रुपैँया लगेको र दमक नगरपालिका वडा नम्बर १५ मा रहेको किनं १२१३ को क्षेत्रफल ३३८.६३ क्षेत्रफलको जग्गाको धनीपुर्जा धितो स्वरुप दिएको र सो जग्गा बिक्री पश्चात ऋण चुक्ता गर्छु भनी झापा गाउँपालिका वडा नम्बर ६ ठेगाना उल्लेख गरेर साली सपना कार्कीले गरेको कागज विकास बुढाथोकीले गौतमलाई थमाए । गौतमले यति नजिकको सम्बन्ध छ कागज पर्दैन भन्दापनि बुढाथोकीले पछि के हो कागज त गरिराख्नु पर्छ भन्दै कागज थमाए तर कागजमा उल्लेख गरिएको धितो भनिएको धनीपुर्जा भने दिएनन् । डेढ रुपैँयाका दरले बुढाथोकीले गौतमलाई व्याज तिर्दै गए । एक बर्षपछि फेरी बुढाथोकीले कुखुरा पसल गर्छु भनी दुई लाख रुपैँया लगे । त्यसको एक बर्षपछि सम्म व्याज निरन्तर तिरिरहे । त्यहि बिचमा बुढाथोकीले साला सिंहबहादुर बस्नेतलाई समेत गौतम परिवारसँग नजिक बनाइसकेका थिए ।

जग्गा कारोबार गर्दै आएका बस्नेतले जग्गा बैना गर्न भनी १० लाख रुपैँया मागे । मंगलीमाया विदेशमा हुँदा गौतमलाई निरन्तर पैसा पठाउँथिन । उनले मंगलीमायाले राख्न दिएको पाँच लाख रुपैँया बस्नेतलाई दिइन् । दुई महिनापछि मंगलीमाया बिरामी भएर विदेशबाट आइन् । मंगलीमायाले आफुसँग केहि रकम भएको र सो रकम व्याजमा लगाएर उपचार गर्ने योजना गौतमलाई सुनाइन् । गौतमले सो रकम बस्नेतलाई दिन सकिने बताइन् । बस्नेतले गौतममार्फत मंगलीमायाको १० लाख रुपैँया दुई रुपैँया व्याजदरले चुक्ता गर्ने  गरी २०७८ साल असोज २७ गते कागज गरेर एक बर्षका लागि लिए । केहि समय पछि बस्नेत एकाएक फरार भए ।

बस्नेत फरार भएको खबर सुनेर गौतम दबाबमा परिन् र बुढाथोकीको घर गइन् । बुढाथोकीले शुरुमा आफुले लिइदिएको सात लाख रुपैँया फिर्ता गराइदिने तर अरु रकमको जिम्मा नलिने बताए । समय बित्दै गएपछि गौतम थप तनाबमा आउन थालिन र पैसा फिर्ता गर्न बुढाथोकीलाई दबाब बढाइन् । बुढाथोकीले आफुले गौतमलाई जग्गा पास गरिदिने बताए र वडा कार्यालय बोलाए । वडा कार्यालय गएपछि बुढाथोकीले एकाएक बोली फेरे । उनले आफु कागजमा साक्षीमात्र बसेका कारण पैसा नतिर्ने अडान लिन थाले ।

बुढाथोकीले गौतमलाई त्यहि बिचमा सालाको घरमा पुर्याएर साली सपना कार्की बस्नेतसँग कुराकानी गराए । शुरुमा घर बेचेर पैसा फिर्ता गर्ने सपनाले आश्वासन दिइन् । बरु घर किन्ने मानिस खोजिदिन आग्रह गरिन् । पैसा फिर्ता गर्न दबाब बढेपछि सपनाले समेत पैसा फिर्ता नगर्ने बरु अदालत जान भनेर धम्क्याउन थालिन् । गौतमले कानुनी उपचारका लागि पटक पटक प्रहरी चौकी सुरुङ्गा र इलाका प्रहरी कार्यालय अनारमनी गइन् । शुरु शुरुमा प्रहरीले बुढाथोकीलाई झिकाएर छलफल गराएपनि विस्तारै लेनदेनको केश भन्दै प्रहरी पछि हट्न थाल्यो । उनले न्यायका लागि प्रमुख जिल्ला अधिकारीलाई समेत भेटिन् । प्रमुख जिल्ला अधिकारीले प्रहरीलाई न्यायका लागि पहल गरिदिन भने । तरपनि गौतमले पैसा फिर्ता पाउन सकिनन् ।

यता गौतमले उपलब्ध गराएको विकास बुढाथोकीको मोवाइल नम्बर ९८१४०४२१३१ र ९८२४९२९३३१ र सम्पर्क बिहीन भएको भनिएका दिनेशकी श्रीमती सपना कार्की बस्नेतको मोबाइल नम्बर ९८२४०४४१७३ मा सम्पर्क गर्दा सम्पर्क हुन सकेन ।